Azərbaycan, Bakı, 02 oktyabr / Trend , müxbir H.Vəliyev/
Delta Telecom şirkətinin baş direktoru Ramazan Vəliyevin Trend -a verdiyi məlumata əsasən, şirkət ayın sonunadək WiMAX (Worldwide Interoperability for Microwave Access) mobil şəbəkəsini istifadəyə verəcək.
Onun sözlərinə görə, hazırda layihənin birinci fazasında işlər başa çatıb. Bu faza çərçivəsində Bakıda və Abşeron yarımadasında 110 baza-stansiyasının quraşdırılması həyata keçirilib. Ayın sonunadək Delta Telecom-un Skretç kartları və əsas istifadəçilər üçün modemlər satışa çıxarılacaq. WiMAX şəbəkəsinin ötürmə gücü 4,4 Kbit/s təşkil edir.
Vəliyevin sözlərinə görə, layihənin WiMAX şəbəkəsinin regionlar səviyyəsində genişləndirilməsini nəzərdə tutan ikinci fazasının quraşdırılmasına artıq başlanılıb. Bu günə şirkətin mütəxəssisləri tərəfindən WiMAX şəbəkəsinin baza stansiyalarının quraşdırılacağı yerlər müəyyənləşdirilir. Quraşdırma işləri Quba, Gəncə, Astara və digər rayonlarda aparılır. Şirkətin planına uyğun olaraq, layihənin 140 baza-stansiyasının quraşdırılmasını nəzərdə tutan ikinci fazasının işə salınması ilin sonunadək həyata keçiriləcək.
Delta Telecom-un WiMAX şəbəkəsi 802.16e standartı əsasında quraşdırılacaq.
Şəbəkə Delta Telecom-un 2008-ci ilin sentyabrında müqavilə bağladığı Alcatel-Lucent avadanlıqları əsasında quraşdırılacaq.
Vəliyevin dediyinə görə, WiMAX şəbəkəsi gələcəkdə LTE (Long-Term Evolution) texnologiyası ilə birləşəcək. Bu da Azərbaycanda ən sürətli mobil şəbəkənin genişləndirilməsi üçün mühüm addımdır. LTE internet-televiziya, şəbəkə oyunları və s. kimi xidmətlər barədə məlumatların sürətli ötürülməsinə imkan yaradacaq.
Məqalə müəllifi ilə əlaqə ünvanı: [email protected]