Azərbaycan, Bakı, 20 oktyabr / Trend , müxbir H.Vəliyev /
Azərbaycanın Rabitə və İnformasiya Texnologiyaları Nazirliyi tərəfindən doqquz ayın yekunlarına əsasən poçt rabitəsi xidmətlərinin göstərilməsi üçün 12 lisenziya, telekommunikasiya xidmətlərinin göstərilməsi üçün isə 14 lisenziya verilib. Bu barədə nazirliyin məlumatında deyilir.
Məlumatlara əsasən, respublika ərazisində televiziya və radio verilişlərinin keyfiyyətinin artırılması məqsədi ilə hesabat dövrü ərzində Teleradio İstehsalat Birliyi tərəfindən müxtəlif təyinatlı 54 avadanlıq istismara verilib ki, onun da 51-i radio və televiziya verilişləri üçün, ikisi sputnik kanalları və biri antena-fider sistemi üçün nəzərdə tutulub.
Hesabat dövrü ərzində poçt rabitə operatoru "Azərpoçt" MMC tərəfindən 44 yeni poçt rabitəsi şöbəsi istismara verilib. Respublika daxilində qəbul edilən, Azərpoçt şəbəkəsində həyata keçirilən pul köçürmələrinin ümumi həcmi 15 674 797 manat olaraq 180 875 vahid təşkil edib, 15 732 902 manat həcmində 179 147 vahid isə ödənilib. Ötən ilin analoji dövrü ilə müqayisədə qəbul olunan pul köçürmələrinin sayı 17 323 vahid (2 711 268 manat) artıb.
"Azərmarka" şirkəti tərəfindən 24 poçt markası, üç marka, üç markalanmış poçt konvertoru və səkkiz poçt kartı istismara verilib.
Məqalə müəllifi ilə əlaqə ünvanı: [email protected]
