Azərbaycan, Bakı, 15 mart / Trend , müxbir H.Vəliyev/
"Kiçik Sahibkarlığın İnkişafı və Təşviqi" İctimai Birliyi ilin birinci yarısının sonunadək elektron ticarət sisteminə tərəfdaş proqram (affiliate program) təklif edəcək. Bu barədə birliyin rəhbəri Aqil Babayev Trend -a deyib.
İşlər "Azərbaycanda Elektron Ticarət və İnternet Sahibkarlığının İnkişafına Dəstək" çərçivəsində aparılır. Aparılan işlərin əsas məqsədi sahibkarlara, Azərbaycan iqtisadiyyatının dünya iqtisadiyyatına inteqrasiyasına, respublika ərazisində yerli və xarici şirkətlərin virtual nümayiş yerləri yaradılmasına dəstək göstərilməsi, regionların sosial inkişafına elektron kommersiya və informasiya texnologiyalarının inkişafına dəstəkdir.
Layihəyə maliyyə dəstəyini Azərbaycan Prezidenti yanında Qeyri-Hökumət Təşkilatlarına Dövlət Dəstəyi Şurası göstərir.
Babayevin sözlərinə görə, layihənin genişləndirilməsi üçün bu gün İctimai Birliyə növbəti maliyyə yardımının ayrılması gözlənilir. Elektron ticarət sistemində fəaliyyət göstərəcək tərəfdaş proqram AzNET seqmentində tərəfdaşlığın yeni növüdür. Tərəfdaş alıcı ilə satıcı arasında vasitəçi qismində çıxış edir və göstərilən xidmətə görə komissiyon haqq alır.
Bu gün portalda virtual məkan ödənişsiz təklif edilir, lakin gələcəkdə 5-10 manat civarında dəyişən abunəçi ödəməsi müəyyən olunacaq. Elektron ticarət sisteminin perspektivində, həmçinin, onlayn satış sistemi fəaliyyət göstərəcək.
