Azərbaycan, Bakı, 29 mart / Trend , müxbir H.Vəliyev/
Azərbaycanın R.I.S.K. Elmi İstehsalat Şirkəti PANDA (Aeronaviqasiya üçün prosedur - Dizayn və Analiz) əsasında qurulmuş ACCENT Plus aeronaviqasiya sisteminin yeni versiyasını təqdim edib. Bu barədə Trend -a şirkətdən məlumat verilib.
İlk ACCENT Plus sistemi martın 9-11-də Amsterdamda keçirilmiş ATC Global 2010 hava hərəkətinin idarə olunması və nəzarət üzrə II Beynəlxalq sərgi-konfrans zamanı nümayiş etdirilib.
Məlumatların yenilənmiş idarəetmə moduluna malik olan ACCENT Plus aeronaviqasiya sistemi aeronaviqasiya üzrə informasiyanın rəqəmsal formatda idarə olunması və paylanması üçün hazırlanmış AIXM 5.1. (Aeronautical Information Exchange Model) aeronaviqasiya-informasiya mübadiləsinə əsaslanan yeni funksional imkanlara malikdir. Model aeronaviqasiya-informasiya sisteminin cari və gələcək tələblərini, Beynəlxalq Mülki Aviasiya Təşkilatının (ICAO) son tələblərini və maneələr, yanaşma prosedurları və hava limanlarının xəritə məlumatları daxil olmaqla, istifadəçi tələblərini dəstəkləyir.
Sistem hava limanları meydanlarında maneənin aradan qaldırılmasına nəzarətin avtomatlaşdırılmasını, köhnə aerodrom sxemlərinin ICAO standartları üzrə hazırlanmış aeronaviqasiya prosedurlarına uyğunluğunu təmin etməyə və aeronaviqasiya üzrə digər vəzifələrin yerinə yetirilməsinə imkan yaradır.
Azərbaycan və Latviyanın aeronaviqasiya prosedurları üzrə dizaynerləri ICAO 8168 (PANS-OPS) sənədinin tətbiqinə dair təcrübə topladıqdan sonra, öz işlərində avtomatlaşdırılmış vasitələrin tətbiqinin vacibliyi qənaətinə gəliblər. Bundan sonra PANDA-nın yaradılması haqqında qərar qəbul olunub. Bu məsələnin həllinə Azərbaycanın R.I.S.K. şirkəti də cəlb olunub.
PANDA sisteminin rəqabət aparan məhsullardan fərqi ondadır ki, o, tövsiyələr verilməklə idarəedici parametrlərin çoxfaktorlu analizi əsasında bütöv prosedurları müstəqil formalaşdırmaq qabiliyyətinə malikdir.
