Azərbaycan, Bakı, 15 aprel /Trend, müxbir H.Vəliyev/
"Mesaj" səsli məlumatlandırma sistemi vergiödəyicilərinin iş prosesini asanlaşdıracaq və onların vergi borcları barədə məlumatlandırılması prosesini sürətləndirəcək. Bu barədə Vergilər Nazirliyinin rəsmi mətbu orqanı olan "Vergilər" qəzetində bildirilir.
Xidmət vergiödəyicilərinə avtomatlaşdırılmış rejimdə səsli məlumatın ötürülməsinin həyata keçirilməsinə imkan verir. Layihə nazirlikdə fəaliyyət göstərən 195 saylı telefon xidmətinin texniki dəstəyi ilə həyata keçirilib.
Azərbaycanda vergiödəyiciləri stasionar və mobil telefonla dövlət büdcəsinə olan borcları haqqında məlumat ala bilər. Səsli məlumatın göndərilməsi üçün vergiödəyicisinin nömrəsi məlumat baza sisteminə daxil edilir.
Sistem eyni vaxtda 50-dən çox vergiödəyicisinə səsli məlumatın ötürülməsinə imkan yaradır. Sistem səsli məlumatın ötürülməsini iş günlərində saat 09:00-dan 18:00-dək həyata keçirir.