Azərbaycan, Bakı, 26 aprel /Trend, müxbir H.Vəliyev/
Çin "Şərq-Qərb" informasiya supermagistralının çəkiliş layihəsinin reallaşmasına investisiya qoymağa hazırdır. Bu barədə Rabitə və İnformasiya Texnologiyaları Nazirliyinin bazar ertəsi yaydığı məlumatda bildirilir.
Nazirliyin məlumatına görə, layihənin reallaşması ilə bağlı Azərbaycanın qətnaməsi BMT tərəfindən qəbul olunduqdan sonra, Çin hökuməti bu layihəyə böyük maraq göstərib və Azərbaycan tərəfinə müvafiq təkliflər verməklə layihəyə irimiqyaslı maliyyə dəstəyi göstərməyə hazır olduğunu bildirib.
BMT tərəfindən qəbul olunmuş "Şərq-Qərb" superinformasiya magistralının yaradılması üzrə Azərbaycanın qətnaməsi ümumilikdə 20 ölkənin birləşdirilməsini nəzərdə tutur və regionun inkişafında mühüm rol oynayacaq. Layihənin reallaşması Qərbi Avropa və Sakit okean hövzəsinə daxil olan ölkələr arasında "uçurum"un aradan qaldırılmasına yönəlib.
Bundan əvvəl rabitə və informasiya texnologiyaları naziri Əli Abbasovun dediklərinə görə, siyasi qətnaməyə əsasən, bütün regional ölkələrə bu layihənin reallaşması üçün lazımi tədbirlərin həyata keçirilməsi tövsiyə olunub və Xəzər seqmentinin çəkiliş layihəsi Azərbaycanın təşəbbüsləri çərçivəsində həyata keçiriləcək.
Hazırda Azərbaycan və Türkmənistan arasında optik-lif kabel magistralının Xəzər seqmentinin çəkilişi üzrə müəyyən razılaşmalar əldə olunub. İki ölkənin rabitə administrasiyalarına göstərişlər verilib və layihə dövlətlərarası komissiyanın protokoluna daxil edilib. Azərbaycanla Türkmənistan arasında optik-lif kabel magistralının Transxəzər seqmentinin çəkilişi bu gün çox sərfəlidir, çünki bu, marşrutun azaldılmasına, mübadilə olunan trafikin həcminin artırılmasına, Qırğızıstana və Çinə birbaşa çıxışa imkan yaradır.
Rabitə və informasiya texnologiyaları naziri Əli Abbasov 27-29 aprel tarixlərində Çin Xalq Respublikasında səfərdə olacaq, BMT-nin Nyu-York və Pekin nümayəndəliklərinin iştirakı ilə "Şərq-Qərb" layihəsi üzrə bəzi məsələləri müzakirə edəcək. O, həmçinin, Çinin Şanxay şəhərində "Ən yaxşı şəhər, ən yaxşı həyat" devizi altında keçiriləcək "Expo - 2010" Ümumdünya sərgisində iştirak edəcək.
Səfər çərçivəsində Abbasov Çinin sənaye və informasiya texnologiyaları naziri, eləcə də, "Huawei" və "China Telecom Corp." şirkətlərinin idarə heyətlərinin sədrləri ilə görüşəcək.