Azərbaycan, Bakı, 17 iyun /Trend, müxbir H.Vəliyev/
Azərbaycanda elektron resursların informasiya müdafiəsinin səviyyəsi lazımi səviyyədə deyil və orta səviyyə kimi qiymətləndirilir. Bu barədə Azərbaycanın rabitə və informasiya texnologiyaları naziri Əli Abbasov Azərbaycan Diplomatiya Akademiyasında çıxışı zamanı deyib.
Nazirin sözlərinə görə, hazırda Azərbaycan kibercinayətkarlıqla "Kibercinayətkarlıq haqqında" beynəlxalq konvensiyaya uyğun həm dövlətlərarası səviyyədə, həm də respublikadaxil səviyyədə mübarizə aparır.
"İnternet şəbəkəsində arzuolunmaz hadisələrlə mübarizə əsasən üç istiqamətdə həyata keçirilir: ilkin provayder səviyyəsində, ikinci dərəcəli internet-servis-provayder və istifadəçi səviyyəsində. Təəssüf ki, boşluq internet-servis-provayder səviyyəsində də mövcuddur. Tənzimləyici orqan kimi, biz onların qarşısında informasiya müdafiəsini gücləndirmək, yeni texnologiyaları tətbiq etmək tələbini qoyuruq. Azərbaycanın informasiya təhlükəsizliyi bazarında hazırkı vəziyyəti qiymətləndirsək, bu orta səviyyədədir", - nazir bildirib.
Abbasovun sözlərinə görə, yalnız ötən il ABŞ-da internet istifadəçilərinin kibercinayətkarların fəaliyyəti ilə bağlı itkiləri təxminən 400 milyon dollar təşkil edib. Əgər bank sektorunu da nəzərə alsaq, onda məbləğ milyard dollara bərabər ola bilər.
Bu yaxınlarda nazirlik internet-provayderlərin fəaliyyətini lisenziyalaşdırmaq təşəbbüsü ilə çıxış edib. Abbasovun fikrincə, bu, onlar tərəfindən mənfi qarşılanıb.
Əvvəlcə nazirin dediyi kimi, ISP-nin fəaliyyətini lisenziyalaşdırmaq zərurəti iki səbəblə bağlıdır: internet istifadəçilərinin hüquqlarının pozulması və virtual şəbəkədə daima artan təhlükəsizlik qorxusu. "İnternet-provayderlərin lisenziyalaşdırılması onların fəaliyyətini tənzimləmək üçün əsas olacaq", - nazir hesab edir.
Azərbaycan İnternet Birliyinin sədri Qalib Qurbanov öz növbəsində hesab edir ki, internet-servis-provayderlərin fəaliyyətinin lisenziyalaşdırılması onlar tərəfindən göstərilən xidmətin keyfiyyətini artırmağa imkan verəcək. Onun sözlərinə görə, ISP fəliyyətinin reqlamentinin olmaması lazımi səviyyədə xidmət göstərməyən çoxlu sayda provayderlərin yaranmasına gətirib çıxarıb.
"Hazırda istənilən şəxs minimal avadanlıq almaqla internet-xidmət göstərə bilər. Bazarın bu seqmentində nəzarətin olmaması bazarda təsadüfi və hazırlıqsız provayderlərin fəaliyyətinə səbəb olub. Onların nə texniki bazası, nə təhlükəsizlik avadanlığı, nə də ki mütəxəssisləri var. Onların göstərdikləri xidmətin keyfiyyəti isə daha yaxşı ola bilərdi. Son nəticədə aldadılan istifadəçilər olur", - Qurbanov qeyd edib.
Qurbanovun sözlərinə görə, Azərbaycan İnternet Birliyi AzNet seqmentinə nəzarət üzrə yəni həvəskar səviyyədə xidmət göstərən provayderlərin yaranmasının qarşısının alınması planında bəzi öhdəlikləri öz üzərinə götürə bilər.