Azərbaycan, Bakı, 19 iyul /Trend, müxbir H.Vəliyev/
Yaxın aylarda Dilmanc nitqin tanınması sistemlərinin informasiya bazasına inteqrasiyası planlaşdırılıb. Bu barədə Trend-ə bazar ertəsi Dilmanc layihəsinin rəhbəri Əbülfət Fətullayev məlumat verib.
Fətullayevin sözlərinə görə, Dilmanc uğurla sınaqdan keçib. Hələlik məlumat sisteminin informasiya bazası ilə bağlı bir sıra həll olunmamış məsələlər var.
"Dilmancın məlumat xidmətinə tezliklə inteqrasiyasına əsas maneələrdən biri "109" xidməti bazasının redaktəyə ehtiyacı olmasıdır, çünki orada müəssisə və təşkilatların qısaldılmış adları var. Bu informasiya insan tərəfindən asan qəbul edilsə də, bunu onu hərfi mənada anlayan sistemə şamil etmək olmaz. Güman edirəm ki, bu məsələ yaxın aylarda həll olunacaq, bundan sonra isə məlumat xidmətinin avtomatlaşdırılması prosesinin nizama salınması xüsusi səy tələb etməyəcək", - Fətullayev qeyd edib.
Dilmanc sistemlərinin "109" məlumat xidmətinin informasiya bazasına inteqrasiyası rabitə və texnologiyalar naziri Əli Abbasovun tapşırığı ilə həyata keçiriləcək.
Bundan əvvəl Dilmanc layihəsinin rəhbəri bildirmişdi ki, Dilmancın keyfiyyətli səslənmə və ədəbi tələffüz funksional sistemləri nitqin 90 faiz dəqiqliklə tanınmasına imkan verir. Səhv nəticələr müxtəlif regionlarda əhalinin nitqindəki dialekt fərqləri, eləcə də loru sözlərlə əlaqədardır.
Bu gün nitqin tanınması sistemləri layihəsində uyğunlaşma sistemi də tətbiq edilir. Əgər əvvəllər sistem danışandan asılı deyildisə, bu gün müəyyən səs altında proqramın qurulmasına imkan verən işlər aparılır. Proqram danışanın mətni 3-4 dəqiqə ərzində oxumasından sonra tələffüzə başlayacaq.