Аzərbaycan, Bakı, 27 iyul /Trend, müxbir H.Vəliyev/
Azərbaycanın İT şirkəti "Ultra" Qazaxıstan və Ukraynada təhsil sisteminin avtomatlaşdırılması layihəsinin həyata keçirilməsi üzrə danışıqlar aparır. Bu barədə çərşənbə axşamı Trend-ə şirkətdən bildiriblər.
Şirkətdən verilən məlumata görə, bu məsələ üzrə danışıqlar səmərəli şəkildə davam edir və bu ölkələrdə razılıq əldə olunarsa, layihə Azərbaycanda gerçəkləşdirilən "Azərbaycan təhsil şəbəkəsi" layihəsi əsasında həyata keçirilə bilər.
"Azərbaycan təhsil şəbəkəsi" layihəsi 2008-2012-ci illərdə təhsil sisteminin informasiyalaşdırılması üzrə Dövlət Proqramı çərçivəsində Cisco - AzEduNet və ULTRA şirkətləri tərəfindən həyata keçirilir və ölkənin məktəbləri, təhsil ocaqları və Azərbaycan Təhsil Nazirliyinin strukturlarını birləşdirən yüksəksürətli korporativ intranet-şəbəkələrin yaradılmasını nəzərdə tutur.
Layihənn əsas məqsədi İT-dən istifadə etməklə təhsilin keyfiyyətini artırmaq və ölkənin dünyəvi təhsil sisteminə inteqrasiyasını təmin etmək üçün vahid təhsil informasiya mühitinin yaradılmasıdır. Bu, ilk növbədə, ölkənin təhsil sistemini effektiv şəkildə idarə etmək, həmçinin internet vasitəsilə xarici ölkələrin təhsil müəssisələrini əlaqələndirməyə imkan verəcək.