Azərbaycan, Bakı, 23 avqust /Trend, müxbir H.Vəliyev/
Azərbaycanda mikrobloqinqin inkişafı mobil rabitə operatorlarının texniki dəstəyindən asılıdır. Bu barədə Trend-ə bazar ertəsi "Barkamp" təşkilatının layihə meneceri İlqar Mirzə bildirib.
Mirzənin sözlərinə görə, mikrobloqinq sahəsi İP protokolu üzrə ənənəvi bloqer sistemlərindən fərqlənir. Onun əsas üstünlüyü mobilliyindədir.
"Azərbaycanda mikrobloqinq sahəsinin inkişafı ümumilikdə mobil internetin inkişafının, eləcə də mobil rabitə operatorlarının üzərinə düşür. Hazırda "Twitter" sosial şəbəkəsinin populyar servislərindən olan mikrobloq servisə Azərbaycanın mobil rabitə operatorlarının şəbəkəsi vasitəsilə daxil olmaq mümkün deyil ki, bu da mikrobloqinq sahəsinin inkişafına mane olur. Mikrobloqinqlərin əsas fərqləndirici cəhəti məhdud sayda simvollarının olmasındadır. O, əsas etibarilə qısa operativ məlumatları yazmağa imkan verir. Mikrobloqların vəzifəsi başqalarına nə isə danışmaq deyil, onları baş verənlərdən xəbərdar etməkdir", - Mirzə qeyd edib.
Onun sözlərinə görə, AzNet şəbəkəsində bloqların sayının minlərlə olmasına baxmayaraq, onların yalnız 10 faizi aktivdir.
Azərbaycanda bloqinq sahəsinin inkişafının mühüm tərkib hissələrindən biri də bloqların Azərbaycan dilində aparılmasına imkan verən yerli bloq-platformaların olmasındadır.
"Barkamp"ın layihə menecerinin fikrincə, bloqların populyarlığına səbəb əksər bloqların əyləndirici xarakterli olmasına baxmayaraq, son vaxtlar informasiya texnologiyaları, marketinq və s. sahələr üzrə dar ixtisaslaşmış bloqların populyarlaşmasıdır.
Azərbaycanda bloqinq sahəsinin inkişafı məsələlərinin "Barkamp Azerbaijan"ın təşəbbüsü ilə sentyabrın 10-dan 12-dək keçiriləcək forum zamanı müzakirə edilməsi planlaşdırılıb.