Azərbaycan, Bakı, 7 sentyabr /Trend, müxbir H.Vəliyev/
Regional Rabitə Birliyinin (RRB) Peyk rabitəsi, televiziya və radio yayımı üzrə Komissiyası uzun və orta dalğalı diapazonda sinxron səsli radioveriliş şəbəkəsində radiotezlik resurslarının yenidən paylanması məsələlərini nəzərdən keçirir. Bu barədə çərşənbə axşamı Trend-ə Dövlət Radiotezliklər İdarəsinin baş mühəndisi İlham Əfəndiyev bildirib.
Məsələlərə bu gün Bakıda öz işinə başlayan RRB-nin Peyk rabitəsi, televiziya və radio yayımı üzrə Komissiyası və Radiotezlik spektrinin istifadəsi və radioelektron vasitələrin elektromaqnit uyğunluğunun tənzimlənməsi məsələləri üzrə Komissiyasının iclası çərçivəsində baxılır.
Komissiyanın əsas nəzərdə tutulmuş məsələləri sinxron şəbəkələrin tezliyinin yayılmasıdır (orta və uzun dalğa diapazonu). Söhbət 549 kQs, 873 kQs və 171 kQs tezliklərdən gedir ki, onları da elə uyğunlaşdırmaq lazımdır ki, bir dövlət tərəfindən istifadə olunan ötürücü digər verilişin diaqramına maneə yaratmasın.
Bundan əvvəl Əfəndiyevin dediyi kimi, Azərbaycanda orta və uzun dalğa diapazonu Bakıda 891 kQs,Pirsaatda 1296 kQs tezliyində istifadə olunur. 549 kQs orta və uzun dalğalı diapazon hələ ki istifadə olunmur, lakin Azərbaycan Dövlət Radiotezliklər İdarəsində qeydiyyatdan keçib.
Bu günə bütün postsovet məkanı ölkələri ITU-da (International Telecommunication Union) qeydiyyatdan keçən bu tezlik ehtiyatlarının istifadəsində bərabərhüquqludurlar. Lakin tezliyə maneçilik törədən mənbənin müəyyən olunması hallarında onların yenidən ITU-da qeydiyyatdan keçməsinə ehtiyac yarana bilər.
Mövcud problemləri təfərrüatı ilə öyrəndikdən sonra RRB-nin işçi qrupu bu problemlərin texniki cəhətlərinə xüsusi diqqət ayırmağı və onların optimal həlli yollarını tapmağı planlaşdırır.
Komissiyanın Bakı iclasının gündəminə həmçinin MDB ölkələrinin tezliyinin paylanmasının ümumi cədvəlinin hazırlanması, 29,7 MQs-dan yuxarı tezlik zolağında tezlik koordinasiyası üzrə tövsiyələrin hazırlanması, rəqəmsal ötürücünün tətbiqinin müzakirəsi, RRB ölkələrində peyk rabitəsinin inkişafının aktual istiqamətlərinin öyrənilməsi və s. məsələlər daxildir.