Azərbaycan, Bakı, 18 oktyabr /Trend, müxbir H.Vəliyev/
Azərbaycanda həyata keçirilən "Elektron elm" layihəsi (e-science) oktyabrın 24-27-də Keyptaunda (CAR) keçiriləcək "CODATA" (Committee on Data for Science and Technology) "İctimaiyyət üçün elmi məlumat: bu gündən gələcəyə qədər" 22-ci Beynəlxalq Konfransında təqdim olunacaq. Bu barədə Azərbaycan Milli Elmlər Akademiyasının İnformasiya Texnologiyaları İnstitutundan məlumat verilib.
1966-cı ildə yaradılan "CODATA" beynəlxalq təşkilatı beynəlxalq elmi ittifaqların fəaliyyətini əlaqələndirən və qlobal xarakterli problemlər üzrə tədqiqatların işlənib hazırlanma və keçirilməsinə yardım göstərən Beynəlxalq Elmi Şuraya (ICSU) daxildir.
Konfransda Azərbaycan Milli Elmlər Akademiyasının İnformasiya Texnologiyaları İnstitutunun direktoru Rasim Əliquliyev "e-science" layihəsi ilə təmsil edəcək və Azərbaycanda elektron elmin inkişaf perspektivləri və hazırkı vəziyyətindən danışacaq.
Layihənin həyata keçirilməsi üçün institut tərəfindən konseptual, hüquqi və texnoloji təhlillər, həmçinin elmi sahədə informasiya texnologiyalarının tətbiqi üzrə monitorinq tədqiqatları aparılacaq. Monitorinq informasiya sistemi işlənib hazırlanıb, 150-yə yaxın elmi təşkilatda İT-nin tətbiqinə hazırlıq üçün təhlillər aparılıb.
Hazırda gələcəkdə beynəlxalq elmi şəbəkəyə inteqrasiya edəcək ElmNet akademik şəbəkəsinin genişlənməsi üzrə işlər aparılır.
AMEA 2009-2012-ci illərdə fəaliyyət planının konseptual təhlilini işləyib hazırlayıb. Buna əsasən elektron təhsil şəbəkə infrastrukturu, maddi-texniki baza, elmi müəssisələrin daxili kompüter infrastrukturunu yaratmaq planlaşdırılır.
