Azərbaycan, Bakı, 24 noyabr /Trend, müxbir H.Vəliyev/
İnformasiya-kommunikasiya texnologiyalarının ətraf mühitə mənfi təsirinin səviyyəsi 2020-ci ilədək iki dəfə artacaq və dörd faizə çatacaq. Bu barədə çərşənbə günü rabitə və informasiya texnologiyaları naziri Əli Abbasov deyib.
Nazirin sözlərinə görə, bu gün BMT Beynəlxalq Rabitə İttifaqı (ITU) ilə birlikdə əsas məqsədi İKT-nin ətraf mühitə mənfi təsirinin səviyyəsinin azaldılması olan "SMART 2020" layihəsi hazırlanaraq həyata keçirilir.
"İKT-nin ətraf mühitə mənfi təsirinin səviyyəsinin azaldılması mövzusu bu gün aktualdır və bütün dünyada geniş müzakirə olunur. Dünyada "elektron zibil" adlandırılan radiotexnika, mobil telefonun ətraf mühitə təsirinin azaldılması üzrə müəyyən metodika hələ ki yoxdur. Bununla belə, bu gün aparıcı alimlər, mütəxəssis və politoloqlar ətraf mühitə proqnozlaşdırılan iki dəfəlik mənfi təsirin artımını ümumi ziyanın 15 faizlik kompensasiya edilməsi üçün İKT-nin məhsuldarlığı üzərində işləyirlər", - nazir vurğulayıb.
Abbasovun sözlərinə görə, bu problem Azərbaycanda həyata keçirilən rabitə və informasiya texnologiyalarının inkişafı üzrə "Elektron Azərbaycan" Dövlət Proqamında da öz əksini tapıb.
Azərbaycan İKT-nin ətraf mühitə mənfi təsiri ilə mübarizə üçün assosiasiya yaratmış 34 dövlətin sırasına daxildir.