Azərbaycan, Bakı, 14 dekabr /Trend, müxbir H.Vəliyev/
Yanvar-noyabr ayları ərzində təşkilatlar və əhaliyə göstərilən informasiya və rabitə xidmətlərinin həcmi bir milyard manat təşkil edib ki, bu da ötən ilin müvafiq dövr göstəricisindən 30,8 faiz çoxdur. Bu barədə çərşənbə axşamı Azərbaycan Dövlət Statistika Komitəsinin məlumatında deyilir.
Ümumi həcmdən 74,2 faiz əhaliyə göstərilən xidmətlərin payına düşür. Bununla yanaşı, alınan gəlirlərin 67,5 faizi mobil rabitə xidmətinin payına düşür ki, bu da ötən ilin göstəricisi ilə müqayisədə 31,1 faiz artaraq 697 milyon manat təşkil edib.
Dövlət Statistika Komitəsi ölkədə informasiya-kommunikasiya avadanlığının istehsal sürətinin artırıldığını da qeyd edir. Beləliklə, 2010-cu ilin yanvar-noyabr aylarında ölkədə kompüter, elektron, optik və elektrik avdanlıqlarının istehsalı 103,7 milyon manat təşkil edib. Elektrik avadanlığının istehsalında 83,2 faiz artım qeydə alınıb. Bununla yanaşı, 9,3 milyon manatlıq hazır məhsul anbarlarda yerləşdirilib ki, bu da sənaye müəssisələri məhsullarının ümumi ehtiyatının 4,2 faizini təşkil edib.
Dekabrın 14-nə olan rəsmi məzənnə 0,7987 AZN/USD təşkil edir.
