Azərbaycan, Bakı, 19 yanvar /Trend, müxbir H.Vəliyev/
Azərbaycan Rabitə və İnformasiya Texnologiyaları Nazirliyinin "Aztelekom" İstehsalat Birliyi Gəncənin 54 və 55 saylı ATS-lərin elektronlaşdırılması üzrə işləri başa çatdırıb. Bu barədə çərşənbə günü Trend-ə Gəncə telekommunikasiya qovşağı (TKQ) rəisinin köməkçisi Elşad Əliyev bildirib.
Əliyevin sözlərinə görə, elektronlaşdırmadan sonra 54 saylı ATS-in nömrə tutumu beş min ədəd artırılaraq 15 min ədədə, 55 saylı ATS-in nömrə resusru isə iki min artaraq 12 min ədədə çatıb.
"Bu günə Gəncə TKQ üzrə "AztelekomNet" dövlət internet-servis provayderinin şəbəkəsində genişzolaqlı qoşulmaların sayı minə çatır. Portalların tutumu genişzolaqlı ADSL-ə qoşulmalarla bağlı sorğuların sayından asılı olaraq artırılır", - Əliyev qeyd edib.
Onun sözlərinə görə, Gəncə TKQ-nin yeddirəqəmli nömrələmə sisteminə keçidi üzrə işlər də başaçatma mərhələsindədir. Bu işlər fevralda başa çatmalıdır.
Yeddirəqəmli nömrələmə sisteminə keçməklə, Gəncə şəhərinin telefon nömrələri "5" indeksi ilə başlayacaq (554-xx-xx, 555-xx-xx və s.). Gəncə Bakı, Sumqayıt və Naxçıvandan sonra infrastrukturun inkişafının yeddirəqəmli nömrələmə sistemini tələb etdiyi dördüncü şəhər olacaq.
Gəncə TKQ-nin ümumi nömrə tutumu 2010-cu ilin yanvarında 16 min ədəd artırılıb, 2011-ci il yanvarın 1-nə 68 min ədədə çatıb.
