Azərbaycan, Bakı, 24 yanvar /Trend, müxbir H.Vəliyev/
Azərbaycan İnformasiya Texnologiyaları İnstitutu "Bayes" şəbəkələri əsasında informasiya təhlükəsizliyi risklərinin qiymətləndirilməsi metodunu işləyib. Trend-in məlumatına görə, bu barədə Azərbaycan Milli Elmlər Akademiyası (AMEA) İnformasiya Texnologiyaları İnstitutunun direktoru Rasim Əliquliyev hakim Yeni Azərbaycan Patyiyasının rəsmi saytına müsahibəsində bildirib.
İnstitut tərəfindən qeyri-müəyyənliyin hesablanması üçün xüsusi "Bayes" şəbəkələri kimi "attack trees" əsasında yanaşma təklif olunub.
"Bayes" şəbəkələri kəmiyyət əsaslarını keyfiyyət əsasları ilə effektiv şəkildə birləşdirməyə imkan verir.
Bundan başqa, informasiya təhlükəsizliyi riskləri kontekstində qeyri-müəyyənliyin müxtəlif növlərinin modelləşdirilməsinə mövcud yanaşmaları analiz edib onların üstünlükləri və nöqsanlarını strukturlaşdırılıb, riskin adekvat qiymətləndirilməsi modellərinin işlənməsi istiqamətləri müəyyən edilib. Əliquliyevin sözlərinə görə, informasiya təhlükəsizliyi risklərinin minimumlaşdırılması üçün çoxmeyarlı təhlükəsizlik mexanizmlərinin seçilməsinin OWA-modeli təklif edilib.
"Bununla yanaşı, institutumuz tərəfindən informasiya təhlükəsizliyi risklərinin idarə edilməsi metodologiyalarının müqayisəli analizi üçün meyarlar sistemi və müvafiq metrikalar da təklif edilib", - Əliquliyev bildirib.