Azərbaycan, Bakı, 26 yanvar /Trend, müxbir H.Vəliyev/
Azərbaycandakı HP şirkətinin 2010-cu ilin yekunları üzrə biznesi 62 faiz artıb. Bu barədə çərşənbə günü şirkətin məlumatında deyilir.
Azərbaycanda bu göstərici yalnız artımın 96 faiz təşkil etdiyi Ukraynadan geri qalır. Belarusda 26 faiz,Qazaxıstanda 25 faiz təşkil edir. MDB-nin digər ölkələrində ümumilikdə şirkətin biznesində artım 19 faiz təşkil edib.
2010-cu ildə "HP Azərbaycan" gəlir göstəriciləri üzrə 10 faizlik artım nümayiş etdirərək MDB ölkələri arasında dördüncü yeri tutub. Bu göstərici üzrə Ukrayna 45, Qazaxıstan 25, Belarus 11 faizlik artım nümayiş etdirib, yerdə qalan digər MDB ölkələri üzrə artım cəmi 9 faiz təşkil edib.
2010-cu il ərzində dünyada şirkətin dövriyyəsi 126 milyard manat təşkil edib. 2009-cu ilə nisbətən 10 faiz artım müşahidə olunub. Şirkətin əldə etdiyi nisbətən ən böyük göstərici (21 faizlik artım) məlumatların saxlanması və işlənməsi istiqaməti üzrə olub.
Bir müddət əvvəl HP şirkətinin Azərbaycandakı nümayəndəliyinin rəhbəri Rüfət Hacıəlibəyovun Trend-ə bildiridiyi kimi, 2010-cu ildə "Pavilion" seriyasından olan portativ kompyuterlərin satışında əhəmiyyətli artım qeydə alınıb. Böyük artım standart arxitektura serveri üzrə də qeydə alınıb. Hacıəlibəyovun sözlərinə görə, 2011-ci ildə şirkət inkişaf templərinin saxlanacağını gözləyir, buna dövlətin təşəbbüsü ilə ölkədə reallaşdırılan layihələr, eləcə də telekommunikasiya bazarının inkişafı kömək edəcək.