Azərbaycan, Bakı, 26 yanvar/Trend, müxbir H.Vəliyev/
"Smart Systems Technology" şirkəti Azərbaycanın regionlarında genişzolaqlı internet xidmətlərini irəliyə aparmaqla gələcəkdə regionlarda iştirakını genişləndirməyi planlaşdırır. Bu barədə çərşənbə günü Trend-ə "Smart Systems Technology" şirkətinin marketinq meneceri Sübhan Qaragöz deyib.
Onun sözlərinə görə, şirkətin regional səviyyədə biznesinin genişləndirilməsi ilə bu yaxınlarda yaradılan regional departament məşğul olacaq.
"Bu günə artıq 2011-ci il üçün büdcə müəyyənləşdirilib və bu ilə planalşdırılan işlər çərçivəsində hansı şəhərdə ilk dəfə genişzolaqlı ADSL xidmətinin işə salınacağı barədə qərar qəbul ediləcəyi gözlənilir. Şirkətin təsdiqlədiyi protokola əsasən, ilk növbədə respublikanın Sumqayıt, Gəncə, Mingəçevir və Lənkəran kimi böyük şəhərlərində işlərə başlamaq planlaşdırılır", - Qaragöz bildirib.
ADSL əhatə zonasının genişləndirilməsi genişzolaqlı xidmətə daim artmaqda olan tələbatla izah edilir. Qaragözün sözlərinə görə, bu günə "Smart Systems Technology"nin şəbəkəsində qoşulmaların sayı iki min ədədi ötür.