Azərbaycan, Bakı, 29 mart /Trend, müxbir H.Vəliyev/
Avropa Nüvə Tədqiqatları Mərkəzi (CERN) Azərbaycan Milli Elmlər Akademiyasının Fizika İnstitutunun hesablama mərkəzinin fəaliyyətinin monitorinqini aparır. Bu barədə Trend-ə çərşənbə axşamı Fizika İnstitutunun yüksək enerji laboratoriyasının müdiri Övsət Abdinov deyib.
Onun sözlərinə görə, mərkəzin fəaliyyətinin monitorinqinin əsas məqsədi onun "Atlas" layihəsində iştirakının effektivliyinin müəyyənləşdirilməsidir.
"Monitorinqin müsbət nəticələri institutun hesablama mərkəzinin "Atlas" layihəsinin idarəetmə mərkəzində akkreditasiyası üçün əsas olacaq. Akkreditasiyanın alınması mərkəzimizə EGI (European Grid Infrastructure) layihəsi çərçivəsində verilən Avropa Paylayıcı Şəbəkəsinin bərabərhüquqlu iştirakçısı olmağa imkan verəcək", - Abdinov bildirib.
"Atlas"da akkreditasiya böyük adron kollayderində əsas fiziki eksperimentlərin aparılması üçün lazımdır. Fizika İnstitutunun DATA mərkəzinin hesablama qurğuları artıq Avropa mərkəzinin informasiya axının emalına cəlb edilib.
33 ölkədə yerləşən 200 kompüterdən ibarət EGI layihəsi çərçivəsində paylayıcı şəbəkə 2010-cu il sentyabrın 14-də işə salınıb. Layihə çərçivəsində bütün dünyanın 300 DATA mərkəzində yerləşən kompüterlərin hesablama gücündən istifadə ediləcək.
Azərbaycan seqmentində Avropa Mərkəzinin Fizika İnstitutuna verdiyi 300 kompüter cəlb edilib.
Fizika İnstitutuna CERN-in informasiya axınının emalı ilə yanaşı, iştirakçı ölkələrin resurslarından mürəkkəb tapşırıqların həllində milli maraqlar (enerji resurslarının aşkar edilməsi üzrə geoloji tədqiqatların aparılması, tibbdə və s.) üçün istifadə etməyə də imkan verəcək.
Hazırda Fizika İnstitutu və CERN arasında informasiya mübadiləsi üçün rabitə kanalının buraxılış qabiliyyəti 25 Mbit/s təşkil edir. O, 100 Mbit/saniyədək artırılacaq.