Azərbaycan, Bakı, 19 aprel /Trend, müxbir H.Vəliyev/
Azərbaycanın mobil rabitə operatorları - Azercell və Bakcell qarşısında Pre-paid abonentlərin billinq sisteminin manat tarifinə keçməsindən sonra bir çox məsələləri həll etmək durur. Bu barədə çərşənbə axşamı Trend-ə "RCom" şirkətinin rəhbəri Seymur Məmmədov bildirib.
Məmmədovun sözlərinə görə, bu gün hər iki operatorun, necə deyərlər, "qiymət dövrü" çatıb və onların bütün səyləri yaxın iki ay ərzində baş verəcək konturdan manata keçid prosesinə yönəlib.
"Məxfilik baxımından bu gün hər bir operator rəqibin nə təklif edəcəyini gözləyir. Ona görə də onlar məlumatların açıqlanmasına o qədər də meyil göstərmirlər. Konturdan manata keçid çox çətin və mürəkkəb, həm texniki, həm də təşkilati məsələlərin həll olunmasını tələb edən işdir. Bu, həmçinin marketinq alətini kökündən dəyişdirəcək. Konturlardan manata keçiddən sonra abonentlərdən şirkətlərə sual yağışı yağacaq. Onlara nə baş verdiyini, qiymətlərin niyə belə olduğunu, konturda bunun nə qədər olacağını izah etmək lazım gələcək. Ona görə də bu gün şirkətlərin bütün gücü Call-mərkəzlərin hazırlanmasına yönəlib", - Məmmədov deyib.
Ekspertin hesab etdiyi kimi, konturların manatla hesablanması çox çətin aparılır. Operatorların hazırda satdıqları danışıq konturları manatla danışığın dəyərindən dəfələrlə ucuz başa gəlir.
"Məsələn, 20 manatlıq kart yükləmiş abonent bir kartı 20 dəfə yükləmiş abonentdən daha çox vaxtda danışa bilər. Və bütün bu sualları nizama salmaq üçün operatorlar abonentlərə həmin 20 manatlıq danışıq kartı yüklədikləri zaman əlavə bonus yükləməli olacaqlar", - Məmmədov deyib.
Dünən məlum olduğu kimi, Azercell-in müəyyən etdiyi bir konturun nominal dəyəri manat tarifinə keçildikdə 0,005 manat təşkil edəcək. Nəticədə bir dəqiqləlik danışığın qiyməti 0,30 manat təşkil edəcək.
Məmmədovun fikrincə, hələlik mobil rabitə bazarı belə alətlərə uyğunlaşmayıb və istehlakçıların və marketoloqların özlərinin bu prosesi mənimsəmələri üçün vaxt tələb olunur. Operatorun uğuru da dolayısı ilə bundan asılı olacaq.
Bu gün mobil rabitə operatorlarının abonentləri konturlardan təkcə danışıq üçün deyil, həm də çoxmedialı kontenti əldə etmək, bəzi hallarda isə ictimai nəqliyyatda gediş haqqı üçün istifadə edirlər. Danışıq vaxtı ödəniş vasitəsinə çevrilir. Kontur sisteminin mövcudluğu isə mikroödənişlərin həyata keçirilməsi zamanı problemlər yaradır, çünki abonentlər bu və digər xidmət və ya kontentin alınması zamanı xərclədikləri məbləğlə bağlı təsəvvürə malik olmurlar.
Azərbaycanda GSM standartı ilə üç mobil rabitə operatoru işləyir - Bakcell, Azercell və Azerfon. Billinq sisteminin tamamilə pul vahidləri ilə tarifləşdiyi yeganə operator "Azerfon" MMC-dir. Bakcell və Azercell pre-paid abonentlər üçün kontur sistemindən istifadə edirlər.
