Azərbaycan, Bakı, 11 may /Trend, müxbir H.Vəliyev/
Nömrələrin köçürülməsi xidməti (MNP - Mobile Number Portability) Azərbaycanın üç mobil rabitə operatorları tərəfindən eyni vaxtda işə salınmalıdır. Bu barədə çərşənbə günü Trend-ə Bakcell şirkətinin korporativ satış şöbəsinin müdiri Zaur Bayramov bildirib.
Bayramovun sözlərinə görə, bu xidmətin tətbiqi Azərbaycanın Rabitə və İnformasiya Texnologiyaları Nazirliyinin təşəbbüsüdür. Xidmətin nə zaman tətbiqinə başlanacağı isə onun son qərarından asılıdır.
"Bu xidmət operatorların billinq sisteminin tərkib hissələrindən biridir və CİN abonentlər üçün pul tarifi sisteminin işə salınmasından fərqli olaraq, o, bir sıra vacib tədbirlərin həyata keçirilməsinin tələb edir. Nazirlik artıq üç operatorun hamısına müvafiq tapşırıqlar verib. Bu xidmətdən nə zaman istifadə olunacağı hələlik məlum deyil. Buna baxmayaraq, bütün operatorlar buna hazır olmalıdırlar, çünki onun işə salınması eyni vaxtda həyata keçirilməlidir", - Bayramov bildirib.
Bir müddət əvvəl nazirliyin Tənzimləmə şöbəsinin müdiri Əliyar Təmirovun Trend-ə dediyi kimi, nazirlik ölkənin mobil rabitə operatorları ilə nömrələrin köçürülməsi üzrə xidmətlərin tətbiqi qaydalarını razılaşdırıb.
Qaydaların razılaşdırılması baxılmaq üçün Azərbaycan Ədliyyə Nazirliyinə təqdim ediləcək. O bəyənildikdən sonra bu xidmətin tətbiqi üçün infrastrukturun yaradılması üzrə işlərə başlanacaq.
Tənzimləmə şöbəsinin rəhbəri xidmətin tətbiqinin artıq cari ildə baş tutacağını güman edir.
Qaydalarda bu xidmətin artıq tətbiq edildiyi region ölkələrinin təcrübəsi də öz əksini tapıb. Nömrələrin köçürülməsi xidmətinin tətbiqi üçün bir sıra texniki və normativ-hüquqi məsələləri həll etmək lazımdır. İlkin mərhələ üzrə normativ bazanın yaranmasından sonra xidmət mobil rabitə operatorlarının şəbəkələrində, gələcəkdə isə zərurət yaranacağı halda, stasionar rabitə operatorlarının şəbəkələrində tətbiq olunacaq.
Azərbaycanda MNP xidmətinin tətbiqi abonentlərə operatoru dəyişəcəkləri halda öz nömrələrini saxlamağa imkan verəcək ki, bu da onları nömrələrini dəyişdikləri barədə yaxın adamlarını və iş tərəfdaşlarını xəbərdar etmək zərurətindən azad edir.
Azərbaycanda xidmətin tətbiqi üçün işçi qrupu yaradılıb ki, bura Azərbaycanın telekommunikasiya xidmətləri bazarında fəaliyyət göstərən mobil rabitə operatorları da daxildir.
Nömrələrin köçürülməsi xidmətinin tətbiqi rəqabətin inkişafını stimullaşdırır, çünki operatorlar öz əvvəlki abonentlərini saxlamaq üçün əlavə səylər və yenilərinin cəlb olunması üçün daha cəlbedici xidmətlər göstərməli olacaqlar.
