Azərbaycan, Bakı, 20 iyun /Trend, müxbir H.Vəliyev/
Rusiyanın poçt operatoru "Poçta Rossii" Azərbaycanda poçt-maliyyə xidmətinin inkişafına dəstək göstərəcək. Trend-in məlumatına görə, bu barədə bazar ertəsi "Poçta Rossii" Federal Dövlət Unitar Müəssisəsinin məlumatında deyilir.
Ümumdünya Poçt İttifaqının beynəlxalq pul köçürmələri sistemindən - IFS, STEFI, IFS Light, QCS (Azərbaycanın poçt operatoru "Azərpoçt" MMC STEFI sistemindən istifadə edir) istifadə etməklə məsləhət və texniki kömək "Poçta Rossii"nin bazasında yaradılan ÜPİ-nin beynəlxalq maliyyə xidmətlərinə dəstək regional texniki mərkəzi tərəfindən göstəriləcək.
Moskvada Ümumdünya Poçt İttifaqının beynəlxalq maliyyə xidmətlərinə dəstək regional texniki mərkəzinin yaradılması haqqında saziş 2011-ci il iyunun 22-də ÜPİ Beynəlxalq Bürosunun baş direktoru Eduard Dayan və "Poçta Rossii"nin rəhbəri Aleksandr Kiselyov arasında "Poçt üçlüyü-2011" 10-cu Beynəlxalq forum-sərgisi çərçivəsində imzalanacaq.
Rusiya Federal Poçt Operatoru STEFI sisteminin istismarında böyük təcrübəyə malikdir və poçt-maliyyə xidmətlərinin inkişafı sahəsində liderlərdən biridir. Poçt ödənişləri haqqında ÜPİ sazişinə əsaslanan Şərqi Avropa və Mərkəzi Asiyadakı beynəlxalq elektron poçt pul köçürmələrinin ümumi çıxan trafikinin 70 faizindən çoxu "Poçta Rossii"dən keçir ki, bu da onu regional texniki mərkəzin yerləşdirilməsi üçün nisbətən daha uyğun baza edir.
Mərkəzin əməkdaşları MDB-nin və regionun bir çox digər ölkələrinin təyin edilmiş poçt operatorlarına ÜPİ-nin maliyyə sistemlərinin tətbiqi və istismarı məsələlərində ixtisaslaşdırılmış dəstək göstərəcək, zəruri proqram təminatlarını quraşdıracaq, yeni dəhlizlərin və yeni ödəniş xidmətlərinin yaradılmasını təmin edəcəklər.
