Azərbaycan, Bakı, 17 oktyabr /Trend, müxbir H.Vəliyev/
Microsoft-un Gürcüstan nümayəndəliyinin rəhbəri David Asatiani korporasiyanın Azərbaycan ofisinin fəaliyyətini müvəqqəti idarə edəcək. Bu barədə Trend-ə bazar ertəsi "Microsoft Azerbaijan" şirkətindən məlumat verilib.
Bundan əvvəl Azərbaycan ofisinə rəhbərlik edən Teymur Axundov hazırda Microsoft-un Kanada ofisində yeni vəzifəyə keçib. Axundovun yeni vəzifəsi göstərilmir.
Azərbaycan bazarında Microsoft ölkənin Təhsil və Rabitə və İnformasiya Texnologiyaları nazirlikləri ilə sıx əməkdaşlıq edir.
Azərbaycan hökuməti "Microsoft" şirkəti ilə rəsmi saziş imzalayıb, bu, bütün ölkə ərazisində proqram piratlığının azaldılmasına dair yeni öhdəliyə işarə edir və sazişin əhatə etdiyi bütün hökumət idarələrində qanuni lisenziyalaşdırılmış proqram təminatından istifadə olunmasını təmin etməyə kömək edəcək.
Bu sazişin bir hissəsi kimi Azərbaycan hökuməti saxta proqram təminatı ilə bağlı riskləri azaltmaq və beləliklə də vətəndaşlara, biznes subyektlərinə və hökumət işçilərinə göstərilən xidmətləri yaxşılaşdırmaq məqsədilə qanuniləşdirilmiş e-Hökumət xidmətlərinin yaradılması öhdəliyini götürüb.
