Azərbaycan, Bakı, 10 yanvar /Trend, müxbir H.Vəliyev/
Azərbaycan Rabitə və İnformasiya Texnologiyaları Nazirliyinin Dövlət Radiotezliklər İdarəsi Mehdiabad qəsəbəsində mərkəzləşdirilmiş radiomonitorinq sistemi məntəqəsinin tikintisini başa çatdırıb. Bu barədə Trend-ə Dövlət Radiotezliklər İdarəsinin baş mühəndisi İlham Əfəndiyev deyib.
Əfəndiyevin sözlərinə görə, Mehdiabad qəsəbəsində idarəetmə mərkəzi də yerləşəcək.
Oxşar mərkəzlər Yeni Günəşli qəsəbəsində və Gəncə şəhərində də açılacaq.
Gəncə məntəqəsinin tikintisi üçün artıq ərazi ayrılıb, tikinti üzrə işlərə yaxın müddətdə başlanacaq.
Baş mühəndisin sözlərinə görə, hazırda Azərbaycana efir nəzarətinə 9 əsas və mərkəzləşdirilmiş rejimdən kənarda fəaliyyət göstərən 4 yardımçı məntəqə cəlb edilib.
Hazırda idarənin əsas məqsədi radiomonitorinq sistemi üçün zəruri avadanlıqların alınmasıdır. DRİ tərəfindən ötən ilin sonunda elan edilən tender iştirakçıların sayının az olması səbəbindən baş tutmamış hesab edilib.
Mərkəzləşdirilmiş avtomatlaşdırılmış radiomonitorinq şəbəkəsinin yaradılması layihəsi "Azərbaycan Respublikasında rabitə və informasiya texnologiyalarının inkişafı üzrə 2010-2012-ci illər üçün Dövlət Proqramı"nda (Elektron Azərbaycan) nəzərdə tutulub. Tədbirlər planına əsasən, radiomonitorinq şəbəkəsinin tətbiqi 2012-ci ildə gözlənilir.
Monitorinq şəbəkəsinin yaradılması efir üzərində radionəzarətin təşkilini, respublikada yerləşən və coğrafi relyef səbəbindən ölkənin efir məkanına təsir edə biləcək teleradioyayım stansiyalarının texniki parametrlərini əks etdirən informasiya bazasının yaradılmasını nəzərdə tutur. Layihənin həyata keçirilməsi teleradio ötürücülərin optimal yerini və parametrlərini təmin etməyə imkan verəcək.
Hazırda respublikada və ondan kənarda efir məkanına təsir edə biləcək teleradio ötürücülərin sayının artması texniki parametrləri əks etdirən informasiya bazasının yeniləşdiriliməsini (mövcud məlumat bazası 2004-cü ildə yaradılıb) tələb edir.
