Azərbaycan, Bakı, 3 fevral /Trend, müxbir H.Vəliyev/
Naxçıvan Muxtar Respublikasında (NMR) mobil rabitəyə çıxışın səviyyəsi 102 faizə çatıb. Trend-in məlumatına görə, bu barədə cümə günü NMR-in Bakıdakı daimi nümayəndəliyinin məlumatında deyilir.
2012-ci il yanvarın 1-nə olan məlumata görə, NMR-də aktiv mobil telefon istifadəçilərinin sayı 422 680 ədəd təşkil edib. 2011-ci ilin yekunu üzrə mobil rabitə xidmətinin həcmi 33681,2 min manat olub.
2011-ci ilin nəticələri üzrə NMR-də informasiya və rabitə xidmətlərinin həcmi 39269,4 min manat olub ki, bu da 2010-cu ilin analoji göstəricisi ilə müqayisədə 7,4 faiz çoxdur.
Məlumata əsasən, göstərilən xidmətlərin ümumi həcmindən 85 faiz (33699,8 min manat) qeyri-dövlət informasiya və rabitə müəssisələrinin payına düşüb.
2011-ci ildə qeyri-dövlət müəssisələrinin göstərdiyi rabitə xidmətinin həcmi 2010-cu ilin eyni dövrü ilə müqayisədə 7,1 faiz artıb.
2011-ci ilin yekunlarına əsasən, NMR-in Rabitə və İnformasiya Texnologiyaları Nazirliyinin müəssisələri tərəfindən 5321,3 min manat dəyərində xidmət göstərilib ki, bu da 2010-cu ilin analoji göstəricisinə nisbətən 7,8 faiz çoxdur.
2011-ci ilin yanvar-dekabr ayları ərzində NMR-in ümumi istifadədə olan telefon şəbəkəsinin nömrə tutumu 2305 ədəd artıb, 2012-ci ilin yanvarın 1-nə 100 ailəyə 65 stasionar telefon düşüb.