Azərbaycan, Bakı, 18 aprel /Trend, müxbir H.Vəliyev/
Regional poçt şöbələrində quraşdırılacaq internet-köşklərin partiyası aprelin sonlarında gətiriləcək. Bu barədə çərşənbə günü Trend-ə IREX təşkilatının hüquqşünası Ələkbər Məmmədli məlumat verib.
Layihə USAID-in qrantı hesabına reallaşdırılır.
Məmmədlinin sözlərinə görə, köşklər artıq mayda ümumi istifadə üçün açıq olacaq.
Layihə Azərbaycan Rabitə və İnformasiya Texnologiyaları Nazirliyi və Azərbaycanın poçt rabitə operatoru "Azərpoçt" MMC-nin dəstəyi ilə həyata keçirilir.
Layihəyə əsasən, internet-köşklər əsasən əhalinin sayı çox və bunun üçün münasib infrastrukturun mövcud olduğu rayon mərkəzləri, kənd və qəsəbələrdə yerləşən "Azərpoçt"un 30 poçt şöbəsində quraşdırılacaq.
İnternet-köşklərin respublikanın rayonlarında quraşdırılmasında əsas məqsəd əhali üçün informasiyaya çıxışı təmin etməkdir ki, vətəndaşlar onlayn-ödənişlər edə, dövlət qurumlarına elektron formada müraciət edə, mövcud problemlərlə bağlı ərizə və şikayətlər verə bilsinlər.
