Azərbaycan, Bakı, 1 may /Trend, müxbir H.Vəliyev/
Azərbaycanın informasiya texnologiyaları bazarı ilin əvvəlindən dinamik artım dövrünü yaşayır. Bu barədə çərşənbə axşamı Trend-ə AZEL şirkətinin Direktorlar Şurasının sədri Rasim İbrahimov bildirib.
İbrahimovun sözlərinə görə, bu gün İT bazarının lokomotivi proqram təminatı bazarıdır. Bu bazarın illik artım tempi 30 faizə çatır.
Proqram təminatı bazarından fərqli olaraq, ölkənin kompüter bazarı durğunluq yaşayır.
"Ümumilikdə isə İT bazarının seqmentləri olduqca dinamik inkişaf edir ki, bu da iqtisadiyyatın artımı ilə şərtlənir. Fəal işləməyə çalışdığımız korporativ sifarişçilər səviyyəsində olduqca dinamik artım müşahidə edirik", - İbrahimov vurğulayıb.
Şirkət iqtisadi baxımdan daha gəlirli istiqamətlərə, xüsusən də layihə biznesinə vəsait qoymağa çalışır.
Ekspertin fikrincə, korporativ seqmentin illik artımı təqribən 10-20 faiz təşkil edir ki, bu da əsasən dövlət qurumlarında alıcılıq qabiliyyətinin artımı ilə bağlıdır.
