Azərbaycan, Bakı, 25 iyun /Trend, müxbir H.Vəliyev/
Azərbaycanın poçt operatoru "Azərpoçt" MMC poçt göndərişlərinin təhlükəsizliyini dünya tələblərinə tam uyğun təmin edib. Bu barədə bazar ertəsi Trend-ə MMC-dən məlumat veriblər.
Poçt operatoru poçt korrespondensiyalarının işlənməsi və qorunmasını təkmilləşdirib, əməliyyat və çeşidləmə (göndərişlərin növlərə bölünməsi) zallarının izlənməsi sistemini quraşdırıb, poçt rabitə şəbəkəsində fırıldaqlıqla mübarizəni gücləndirib.
"Poçt şəbəkəsinin informasiya təhlükəsizliyi sistemi yüksək səviyyədədir. Bütün zəruri addımlar atılıb. Respublika üzrə poçt operatoru şəbəkəsində oğurluq faktları sıfır səviyyədədir", - "Azərpoçt"dan deyiblər.
Poçt operatoru işçi heyəti və istifadəçilərinin təhlükəsizliyinin təmin edilməsi üzrə tədbirləri təsdiqləyib, arzu edilməyən faktların qarşısını almaq məqsədilə profilaktik addımlar atıb və ictimai təhlükəsizliyin təmin edilməsi ilə bağlı tədbirlər planı hazırlayıb.
Əsas məqsəd qabaqcıl texnologiyalar əsasında poçt, maliyyə və kommersiya xidmətlərinin göstərilməsində təhlükəsizliyin təmin edilməsi üzrə göstəricilərin məhsuldarlığını və səmərəliliyini yaxşılaşdırmaqdır.