Azərbaycan, Bakı, 28 iyun /Trend, müxbir H.Vəliyev /
Azərbaycan elmi-texnoloji xarakterli startapların maliyyələşdirilməsində Estoniyanın təcrübəsini öyrənməkdə maraqlıdır. Trend-in məlumatına görə, bu barədə Azərbaycanın rabitə və informasiya texnologiyaları naziri Əli Abbasov Bakıda keçirilən ticari-iqtisadi əməkdaşlıq üzrə Azərbaycan-Estoniya hökumətlərarası komissiyasının iclasında çıxışı zamanı bildirib.
"İri transmilli şirkətlər dövlətin maliyyə dəstəyi olmadan keçinə bilərlər, lakin əgər biz XXI əsr iqtisadiyyatı barədə danışırıqsa, o zaman, əlbəttə ki, biz əsas dəstəyimizi kiçik və orta biznesə göstərməliyik", - nazir deyib.
Onun sözlərinə görə, Azərbaycanın 2020-ci ilədək strateji inkişafında vacib aspektlərdən kiçik və orta sahibkarlığa dəstəyin göstərilməsidir.
"Ona görə biz bu sahədə Estoniyanın təcrübəsini öyrənməkdə maraqlıyıq", - Abbasov deyib.