Azərbaycan, Bakı, 28 iyul /Trend, müxbir H.Vəliyev/
Cari ilin ilk yarısında "Bakı Telefon Rabitəsi" İstehsalat Birliyinin (İB) şəbəkəsi üzrə genişzolaqlı qoşulma portlarının sayının artımı 16,4 faizi ötüb. Bu barədə şənbə günü Trend-ə İB-dən məlumat veriblər.
Özəl servis provayderlərinin portları nəzərə alınmaqla "Bakı Telefon Rabitəsi"nin şəbəkəsi üzrə genişzolaqlı internet portlarının sayı 210 min ədədi ötür. Portların ümumi sayından 160 min ədəddən çoxu aktivdir.
Genişzolaqlı qoşulmaların ümumi sayından təqribən 88 mini "BakinterNet" dövlət provayderinin abunəçiləridir.
İlin sonunadək genişzolaqlı qoşulma üzrə abunəçi bazasını 250 min istifadəçiyədək artırmaq planlaşdırılır. Hazırda dövlət operatorunun ümumi istifadədə olan telefon şəbəkələrinin genişzolaqlı internet xidmətləri üzrə yüklənməsi 25 faizə çatır.
İlin əvvəlindən İB-nin şəbəkəsinin yenidən qurulması və genişləndirilməsinə 8 milyon manat investisiya qoyulub.