Azərbaycan, Bakı, 9 oktyabr /Trend, müxbir H.Vəliyev/
Azərfon və Bakcell mobil rabitə operatorları ilin sonunadək dördüncü nəsil şəbəkəsini (4G) işə sala bilərlər. Trend-in məlumatına görə, bunu çərşənbə axşamı jurnalistlərə Azərbaycanın rabitə və informasiya texnologiyaları nazirinin müavini İltimas Məmmədov bildirib.
"Bu məsələdə vacib amil operatorların şəbəkənin işə salınması ilə bağlı müraciətlərinə baxılmasına kompleks yanaşma, tezlik spektrinin ayrılması və müvafiq olaraq, operatorların hazırlığıdır", - Məmmədov deyib.
Hazırda Azərfon LTE texnologiyalarını dəstəkləyən baza stansiyalarının quraşdırılmasını başa çatdırıb.
LTE (Long Term Evolution) texnologiyası dördüncü nəsil baza texnologiyası seçilib. Bu texnologiya 4G ailəsinə mobil şəbəkədə məlumatları 100 Mbit/saniyədən yuxarı sürətlə mobil abonentə, 1 Gbit/saniyə ilə stasionar abonentə çatdırılmasına imkan verir ki, bu da 3G şəbəkəsində on dəfələrlə çoxdur.
"Bakcell" şirkəti artıq ötən ilin noyabr ayında "BakuTel" sərgisində LTE sisteminin qeyri-kommersiya nümayişini həyata keçirib.
