Azərbaycan, Bakı, 15 iyul /Trend/
Azərbaycanda ilk dəfə olaraq "Azercell Telekom" MMC abunəçilərinə "Asan imza" (Mobil imza) xidmətini təklif edir. Bu xidmət hər bir mobil abunəçiyə elektron xidmətlərdən yararlanmaq, elektron imzadan asanlıqla istifadə etmək imkanını yaradır.
Mobil imza xidmətinin sürəti və rahatlığı bir çox dövlət xidmətlərinə çıxışda rast gəlinən maneələri azaldır, xidmət istifadəçilərini və tərtibatçılarını yeni texnologiyaların aktiv istifadəsinə stimullaşdırır. Mobil cihazlar daim insanların yanında olduğundan, onlar istənilən yerdə öz imzalarını təsdiqlətdirə bilirlər.
Xidmətdən istifadə etmək üçün "ASAN xidmət" mərkəzlərində təşkil olunan Azercell Qeydiyyat Məntəqəsinə yaxınlaşmaq lazımdır. Burada "Asan imza" SIM-kartını və elə həmin mərkəzdə yerləşən Vergilər Nazirliyinin Xidmət Məntəqəsindən elektron imza sertifikatını əldə etmək olar. Qeyd edək ki, ilk olaraq bu xidmət "Azercell" fakturalı xətt abunəçilərinə təqdim olunur. "Asan imza" "Mobil imza"lı SIM-kart həm mövcud, həm də yeni nömrələrə uyğunlaşdırıla bilər.
Elektron imza sertifikatlarının etibarlılıq müddəti üç ildir. Vətəndaşlar üçün 3 illik istifadə qiyməti - 30 AZN, dövlət qulluqçuları üçün 80 AZN, sahibkarlıq fəaliyyəti ilə məşğul olan hüquqi və fiziki şəxslər üçün 154 AZN təşkil edir. Xidmətdən aylıq istifadə haqqı əhali və dövlət qulluqçuları üçün 0.50 AZN, sahibkarlıq fəaliyyəti ilə məşğul olan hüquqi və fiziki şəxslər üçün 1 AZN təşkil edir.
Abunəçilərin mövcud SIM-kartlarının "Mobil imza"lı SIM-kartlarına dəyişdirilməsi xidməti haqqı 3.54 AZN təşkil edir. Məlumat üçün bildirək ki, "Asan imza" xidməti Bakı şəhərində aşagıdakı ünvanlarda fəaliyyət göstərəcək:
Asan 1 Xidmət Mərkəzi - Ak. Həsən Əliyev, 36;
Müştəri Xidmətləri ofisi - B.Bağırova, 2;
Azercell Ekspres ofisi - Sahil qəs., Z.Qasimov, 24;
Azercell Ekspres ofisi - Xətai rayonu, Yusif Səfərov, 9/16;
Azercell Ekspres ofisi - Şüvəlan qəs., "Şüvəlan Park"ın binası.
Eyni zamanda, vətəndaşlar Sumqayıt şəhəri, Azərbaycan pr., 12-də yerləşən Müştəri Xidmətləri Mərkəzinə və Gəncədə Şah İsmayıl Xətai pr., 82 ünvanında Azercell Ekspres ofisinə, eləcə də bölgələr üzrə bütün Müştəri Xidmətləri ve Ekspres ofislərinə müraciət edə bilərlər.
"Asan imza" (Mobil imza) haqqında daha ətraflı məlumat əldə etmək üçün http://www.asanimza.az/az/ ünvanına müraciət etmək olar.