Azərbaycan, Bakı, 30 iyun /Trend, müxbir Hüseyn Vəliyev/
Rabitə və Yüksək Texnologiyalar Nazirliyinin Məlumat Hesablama Məzkəzi (MHM) Ədliyyə Naziliyi və Əmlak Məsələləri Dövlət Komitəsinin elektron xidmətlərinin ilkin siyahısını hazırlayıb.
Trend-in MHM-ə istinadən verdiyi məlumata görə, xidmətlər "Elektron hökumət" (e-gov.az) portalına inteqrasiya etdiriləcək.
Siyahının təsdiqindən sonra MHM xidmətlərin portalın infrastrukturu vasitəsilə müvafiq qurumlara inteqrasiyasını təmin edəcək. Dövlət qurumlarının elektron xidmətlərinin portala inteqrasiyasından sonra onların istifadəsi zamanı kağız sənədlərin skan edilib portala göndərilməsinə ehtiyac qalmayacaq.
Vətəndaşa dövlət qurumlarının informasiya bazasından öz sənədlərini avtomatik qaydada alması üçün autentifikasiyadan (login, parol və elektron imzadan istifadə ilə) keçməsi əlçatan olacaq.
Layihənin həyata keçirilməsi dövlət qurumlarının "Elektron hökumət" portalı vasitəsilə e-xidmət göstərilən zaman digər dövlət qurumlarının informasiya bazasından onlayn rejimdə zəruri məlumat almalarına şərait yaradacaq. Bu, öz növbəsində, siyahının genişləndirilməsinə və əhaliyə göstərilən elektron xidmətlərin keyfiyyətinin artırılmasına imkan verəcək.
Qeyd edək ki, hazırda "Elektron hökumət" portalına respublikanın 40 dövlət qurumu qoşulub.