Azərbaycan, Bakı, 3 sentyabr /Trend, müxbir Hüseyn Vəliyev/
Qazaxıstan və Azərbaycan Trans Avrasiya Super İnformasiya Magistralının (TASİM) Xəzər seqmentinin çəkilməsi məsələsini razılaşdırıblar. Trend-in məlumatına görə, bunu çərşənbə günü jurnalistlərə rabitə və yüksək texnologiyalar naziri Əli Abbasov deyib.
Onun sözlərinə görə, sualtı seqmentin tikintisi layihəsinin reallaşdırılması üzrə müqavilə yaxın vaxtlarda imzalanacaq.
Nazir qeyd edib ki, hazırda bu layihə çərçivəsində elan ediləcək tenderin şərtləri hazırlanır: "Uzun müddət müzakirələrin aparıldığı magistralın Xəzər seqmentinin çəkilişi layihəsinin reallaşdırılacağı birmənalıdır".
Qeyd edək ki, hazırda TASİM layihəsinə Rusiya (operator "Rostelekom"), Qazaxıstan ("KazTransKom"), Türkiyə ("TurkTelecom") və Çin ("ChinaTelecom") cəlb edilib. Azərbaycan layihədə Rabitə və Yüksək Texnologiyalar Nazirliyinin Beynəlxalq Əlaqələr və Hesablaşmalar Mərkəzi ilə təmsil olunub.
Layihənin reallaşdırılması Qərbi Avropa və Sakit okean hövzəsi ölkələri arasında "informasiya uçurumu"nu aradan qaldırmağa imkan verəcək.
