Elmi parklar üzrə Beynəlxalq Assosiasiyanın (International Association of Science Parks IASP) baş direktoru Luis Sansın (Luis Sanz) Bakıya səfəri gözlənilir. Bu barədə Trend ə Azərbaycanın Rabitə və İnformasiya Texnologiyaları Nazirliyindən məlumat verilib.
L.Sans 2006-cı il oktyabrın 3-dən 6-dək keçiriləcək BakuTel 2006 12-ci beynəlxalq telekommunikasiya və informasiya texnologiyaları sərgisi çərçivəsində "Xüsusi iqtisadi zonalar: Azərbaycanda sabit inkişafın yeni istiqaməti"nə həsr olunmuş beynəlxalq konfransa dəvət olunub.
Səfər çərçivəsində o, rabitə naziri Əli Abbasov, yerli İT şirkətlərinin rəhbər şəxsləri, dövlət strukturlarının nümayəndələri ilə görüşəcək.
Apreldə Azərbaycan nazirliyin qismində Elmi Parklar Assosiasiyasının assosiativ üzvü olub.
Elmi Parklar üzrə Beynəlxalq Assosiasiya 1984-cü ildə yaradılıb və 66 üzvü var. Bura Argentina, Braziliya, Belçika, Fransa, Portuqaliya, Rumıniya, Rusiya, Lüksemburq, Sinqapur, Böyük Britaniya, Avstriya və s. daxildir. IASP üzvlərinin ümumi sayı 315-dir.