Bu gün Bakıda "Müasir şəraitdə poçt rabitəsi sahəsində insan resurslarının potensialının artırılması" mövzusunda beynəlxalq seminar öz işinə başlayıb. Trend xəbər verir ki, tədbirdə Azərbaycan tərəfdən rabitə və informasiya texnologiyaları nazirinin müavini İltimas Məmmədov və dövlət müəssisələrinin fəaliyyətinin koordinasiya şöbəsinin poçt sektorunun müdiri Novruz Məmmədov təbrik nitqilə çıxış edib.
Azərbaycanın rabitə naziri Əli Abbasovun seminar iştirakçılarına ünvanladığı təbrik məktubu oxunub.
Tədbirdə Rusiya, Özbəkistan, Latviya, Estoniya, Gürcüstan, Ukraynadan mütəxəssislər, həmçinin Ümumdünya poçt birliyi (ÜPB) və Rabitə sahəsində regional birliyin (RRB) nümayəndələri iştirak edib.
Seminarın gündəliyinə aşağıdakı məsələlər daxildir: kadrlar - müasir mərhələdə poçt rabitəsinin inkişafının əsası, personalın idarə olunması- poçt rabitəsində korporativ mühitin yaradılması üçün baza, personalın seçim, qiymətləndirmə, attestasiya sistemi və onun əməyinin səbəbləri; praktiki misallar, poçt rabitəsi müəssisələri üçün kadr hazırlığı.
Seminar ÜPB-nin maliyyə yardımı ilə keçirilir və ÜPB nümayəndələri, RRB-nin İcra komitəsi və onun 11 üzvünün iştirakı ilə (Türkmənistan, Ermənistan, Litva və Qırğızıstan istisna olmaqla) Rabitə sahəsində regional birlik (RRB) tərəfindən təşkil olunub.
Seminarda Azərbaycan, Belarusiya, Qazaxıstan, Latviya, Rusiya, Özbəkistan, Ukrayna və ÜPB-nin Beynəlxalq Bürosunun nümayəndələri məruzə ilə çıxış edəcək. Seminar zamanı iştirakçılar insan resursları ilə iş sahəsində RRB Poçt Xidmətlərinin strategiyası, kadr siyasətinin əsas istiqamətləri, menecment və kadr siyasəti, müasir şəraitdə personalın idarə olunmasının mahiyyəti haqqında informasiya mübadiləsi aparacaqlar. Tədbirin sonunda "Kadr siyasəti. Uğurlar, problemlər, ÜPB və RRB çərçivəsində qarşılıqlı əlaqənin zərurəti" mövzusunda dəyirmi masanın keçiriləcəyi gözlənilir.
Bundan başqa, sentyabrın 14-də Rabitə sahəsində regional birlik (RRB) Komissiyasının 23-cü toplantısı və RRB poçt rabitəsi operatorları şurasının 12-ci toplantısı keçiriləcək. Toplantılarda aşağıdakı məsələlər gözdən keçiriləcək: "Müasir cəmiyyətdə poçt rabitəsinin inkişafı üzrə ÜPB-nin 23-cü Konqresinin qərarlarının gerçəkləşdirilməsində RRB-nin Rabitə Adminstrasiyalarının rolu", "RRB-nin Rabitə Adminstrasiyalarının gələcəkdə poçt sektorunun inkişafı üzrə 2006-cı ildə ÜPB-nin Ümumdünya Strateji konfransına hazırlanması", "RRB RA-nın ÜPB-nin İnzibati Şurasının Sessiyasına hazırlanması" və b.
