"Junior Achievement Azerbaijan" azərbaycanlı tələbələrin Hewlett Packard Global Business Competition (HPGBC) müsabiqəsində və JAA Work Experience Programme (WEP) peşəkar təcrübə proqramında uğurlu iştirakına həsr olunmuş təqdimat keçirəcək. Trend ABŞ-ın Azərbaycandakı səfirliyinin məlumatına istinadən xəbər verir ki, tədbir oktyabrın 27-də Park Inn Hotel-də keçiriləcək.
HPGBC-nin finalında Zəngi Litseyinin iki şagirdinə və ExxonMobil, McDermott Caspian Contractors, Statoil Azerbaijan, KCA Deutag və Bank Nikoil -da JAA yay təcrübəsində iştirak etmiş 9 şagirdə mükafatlar veriləcək.
Mərasimdə Azərbaycanın Təhsil Nazirliyinin, ABŞ səfirliyinin, USAID, yerli və beynəlxalq işgüzar dairələrin, məktəb rəhbərlərinin nümayəndələri iştirak edəcək. Tədbir USAID və özəl donorların maliyyə yardımı ilə keçirilir.
"Junior Achievement Azerbaijan" öz layihəsini USAID və özəl donorların həyata keçirdiyi "Azərbaycan məktəblərində iqtisadiyyatın tədrisi" proqramı çərçivəsində reallaşdırır. Hər il təşkilat 150 şagirdi HPGBC-nin İnternet-müsabiqəsində iştirak etmək imkanı ilə təmin edir.