Rotterdam məhkəməsində "First International Merchant Bank" (FIMBank) və Azərbaycan hökuməti arasındakı iş üzrə növbəti məhkəmə dinləmələrinin tarixi müəyyən olunub. Rabitə və İnformasiya Texnologiyaları Nazirliyinin kadrlar və hüquq şöbəsinin müdiri Bəxtiyar Məmmədovun Trend ə verdiyi məlumata görə, dekabrın 18-də məhkəmə şahidlərin ifadələrini dinləyəcək.
Dekabrın 10-da isə Paris məhkəməsi Rabitə Nazirliyinin Fransanın "Eutelsat S.A" şirkətinə yatırdığı 500 min səhmin və onların 1 mln. dollarlıq dividendlərinin xüsusi hesabda girov saxlanması ilə bağlı qərarın ləğv edilməsinə dair Azərbaycan tərəfinin müraciəti ilə bağlı qərar verəcək.
FIMBank guya Rabitə Nazirliyi və "Pochtbank" SKB-nin zəmanəti ilə nazirliyin mövcud olmayan Aztell ($3035000) və Baktell ($1560000) müəssisələrinə ayrılmış kreditin ödənilməməsi faktı üzrə 2004-cü ilin iyulunda Azərbaycan hökumətinə qarşı iddia qaldırıb.