Azərbaycan Rabitə və informasiya Texnologiyaları Nazirliyi CDMA (Code Division Multiple Access- kodlu bölmələrlə çoxsaylı giriş sistemi) şəbəkəsini regionlarda genişləndirmək niyyətindədir.
Nazirliyə istinadən Trend məlumat verir ki, Aztelekom istehsalat birliyi bu istiqamətdə müvafiq işlər aparır. Hazırda Masallı və Şəmkirdə CDMA-nın yeni stansiyaları istismara hazırdır. Quba və Xaçmazda yeni stansiyaların qurulması üzrə işlər aparılır.
İlk dəfə bu xidmət üzrə İB Abşeronda, sonralar Şamaxıda, Gəncədə, Lənkəranda və Zaqatalada fəaliyyətə başlayıb.
Hazırda Rabitə Nazirliyinin müəssisələri üzrə CDMA abunəçilərinin sayı 5,4 mindir. BTRIB üzrə bu rəqəm 3925, Aztelekom üzrə 1471-dir.
CDMA (Code Division Multiple Access- kodlu bölmələrlə çoxsaylı giriş sistemi) GSM-dən sonra işlənib hazırlanan rəqəmsal simsiz texnologiyadır. CDMA danışığı rəqəmsal informasiyaya konversiya edir, sonra radiosiqnal kimi simsiz şəbəkə üzrə ötürür. İlk dəfə kommersiya məhsulu şəklində 1995-ci ildə təqdim olunan CDMA dünyada ən tez yayılan simsiz texnologiyalardan biridir. 1999-cu ildə Beynəlxalq Telekommunikasiya Birliyi (International Telecommunications Union) CDMA-nı "üçüncü nəslin" (3G) yeni simsiz sistem üçün sənaye standardı kimi seçib.