Azərbaycan Milli Elmlər Akademiyasının İnformasiya Texnologiyaları İnstitutunda (AMEA İTİ) Booz Allen Hamilton konsaltinq şirkətinin baş məsləhətçisi İnqa Kreqor ilə görüş keçirilib.
Cümə günü İTİ-dən Trend ə verilən məlumata görə, görüşdə Azərbaycanın Rabitə və İnformasiya Texnologiyaları Nazirliyinin məsləhətçis Lətif Kəngərlinski də iştirak edib.
Bu yaxınlarda Azərbaycanın Rabitə Nazirliyi Amerikanın Booz Allen Hamilton şirkətini rəsmi şəkildə ölkədə regional innovasiya zonasının yaradılması layihəsinin məsləhətçisi elan edib.
Layihəyə əsasən şirkət nazirliyə təqdim etmək üçün regional innovasiya zonasının yaradılması üzrə təkliflər paketini hazırlamalı və nazirlik də öz növbəsində onu hökumətə təqdim edəcək.
Şirkətin məsləhətçisi bəyan edib ki, görüşün keçirilməsinin əsas məqsədi IT sahəsində elmi tədqiqatlar sektorunun nailiyyətləri və problemləri ilə tanışlıqdır.
Azərbaycanda informasiya cəmiyyətinin formalaşması prosesindən danışan institutun direktoru Rasim Əliquliyev qeyd edib ki, informasiya texnologiyaları sahəsində ABŞ ilə münasibətlərin genişləndirilməsi bu sahədə ABŞ-ın təcrübəsindən istifadə etmək imkanı verəcək.
O, həmçinin Azərbaycanda yeni elm iqliminin formalaşmasının zəruri olduğunu qeyd edib və bildirib ki, bu istiqamətə Rabitə Nazirliyinin bölmələri ilə işlər görülür.
İnstitutun direktoru Booz Allen Hamilton tərəfindən biznes iqlimin yaradılması sahəsində hazırlanmış təkliflərin, təşkilati məsələlərin əhəmiyyətini vurğulayıb. Regional innovasiya zonasının yaradılması layihəsində kiçik və orta innovasiya sahibkarlığının inkişafı üçün texnoparkların yaradılması, elektron avadanlıq və proqram təminatının istehsalı və ixracı üzrə regional bazanın yaradılması nəzərdə tutulub.