Naxçıvan MR-in Bakıdakı nümayəndiliyindən Trend ə bildiriblər ki, 2006-cı ildə NMR-də rabitə sahəsində müəssisə, təşkilat və əhaliyə 10441,6 min manat dəyərində xidmət göstərilib ki, bu da 2005-ci il göstəricisindən 15,8% çoxdur. Ümumi göstərilən xidmətlərin 76,1%-i özəl sektorun payına düşüb ki, bu da əvvəlki illə müqayisədə 17,1% çoxdur.
NMR rabitə və informasiya texnologiyaları nazirliyi tərəfindən 2496,8 min manat həcmində xidmət göstərilib. Göstərilən xidmətlərin artımı 11,9% təşkil edib. Qeyd olunan dövr ərzində nazirlik üzrə 3395 telefon xətti çəkilib ki, bu da 361 vahid, yaxud 11,9% çoxdur.
Qeyd olunan dövr ərzində NMR rabitə müəssisələrində işçilərin sayı 816 nəfər olub ki, bu da 2005-ci il göstəricisindən 4,5% çoxdur. Rabitə işçilərinin orta aylıq əmək haqqı 5,2% artaraq 110,3 manat ətşkil edib.
2006-cı ildə NMR rabitəsi Trans-Asiya-Avropa (TAA) fibrooptik magistralına qoşulub. İki şəbəkə istismara verlib - Naxçıvan və Bakı arasında STMİ səviyyəli tranzit şəbəkəsi və muxtar respublika ərazisində magistral üzrə SDH şəbəkəsi. Birinci şəbəkə müxtəlif kanallar videokonfranslar, videotelefon və s. yaradılması üçün kifayət həcmdə ehtiyata malikdir. İkinci şəbəkə Babək, Culfa, Nehrəm, Abraqunus, Gülüstan mərkəzi ATS-lərini əhatə edir.
