Azərbaycan, Bakı /müx. Trend S.Babayeva/ Azərbaycanlı tələbələrin ABŞ-ın universitetlərində İT ixtisasları üzrə növbəti dəfə təhsil almaq imkanı yaranacaq. Azərbaycanın Rabitə və İnformasiya Texnologiyaları Nazirliyindən verilən məlumata görə, hazırda Kaliforniya Universiteti (University of California, Los Angeles - UCLA) və San-Xose Dövlət Universiteti (San Jose State University SJSU) ilə danışıqlar aparılır. Xatırladaq ki, sözügedən ali təhsil ocağı ilə fevralda əməkdaşlıq memorandumu imzalanıb.
Danışıqlarda təhsil yerlərinin və tarixlərin müəyyənləşdirilməsi ilə bağlı müzakirələr aparılır. Analoji danışıqlar həmçinin Asiyanın Texnologiyalar İnstitutu (Tailand) ilə aparılır.
Təmaslar bitdikdən sonra namizədlərin seçilməsi ilə bağlı müsabiqə elan ediləcək, sənədlər yekun seçim üçün universitetlərə göndəriləcək. Nazirlikdə ümid edirlər ki, məsələ 2007-ci ilin sonunadək həllini tapacaq.
Hazırda 30-dək azərbaycanlı tələbə İT texnologiyaları üzrə ABŞ-ın C.Meyson adına Universitetində, Odessanın Rabitə Akademiyasında, Koreyanın Perspektiv Elmi Araşdırmalar və Texnologiyalar İnstitutunda (Korea Advanced Institute of Science and Technology Korean Advanced Institute of Science and Technology) təhsil alırlar.
Bu ali təhsil ocaqları ilə alınan razılaşma əsasında azərbaycanlı tələbələr pulsuz təhsil alırlar, təqaüdləri isə Rabitə Nazirliyi ödəyir. Namizədlərin qarşısına qoyulan əsas tələblər - Azərbaycan vətəndaşlığı və ingilis dilini mükəmməl səviyyədə bilmələridir (TOEFL, yaxud da IELTS sertifikatı).
"Biz İsveçdən, Göteborq İnformasiya Texnologiyaları Universitetindən xəbərlər gözləyirik. Buraya Bakı və Naxçıvandan 8 nəfər namizədin sənədi göndərilib" - deyə nazirlikdən bildiriblər.