Azərbaycan, Bakı /müx. Trend S.Babayeva/ İnformasiya texnologiyaları üzrə ikinci Azərbaycan-İsrail biznes-forumu 2008-ci ildə İsraildə keçiriləcək. Rabitə və İnformasiya Texnologiyaları Nazirliyinin yaydığı məlumata görə, bunu rabitə və informasiya texnologiyaları naziri Əli Abbasov deyib.
Onun sözlərinə görə, üçüncü forum Azərbaycan-Kaliforniya-İsrail əməkdaşlığı çərçivəsində keçiriləcək. Görüş yeri Kaliforniya ştatı (ABŞ) olacaq.
İnformasiya texnologiyaları üzrə birinci Azərbaycan-İsrail biznes-forumu iyunun 26-da Bakıda doqquz İsrail və 30-a yaxın Azərbaycan şirkətinin iştirakı ilə keçirilib.
Tərəflər dövlət idarələri arasında saziş imzalamaqla müvafiq sahədəki əməkdaşlığı möhkəmləndirmək niyyətindədirlər. Hazırda sənəd işlənmə və razılaşdırılma mərhələsindədir. Sənədin dəqiq imzalanma tarixi hələ bəlli deyil.
