Azərbaycan, Bakı, 17 sentyabr /Trend, müxbir Ə. Həsənov/
Əmlak Məsələləri Dövlət Komitəsi "Bakı Çayçəkici" ASC-nin səhmlərinin 93,96 faizinin satışı üzrə investisiya müsabiqəsi elan edib. Trend-in məlumatına görə, bu barədə bazar ertəsi komitənin nəşri olan "Mülkiyyət" qəzetində deyilir.
Müsabiqəyə təqdim edilən səhmlər investisiya müsabiqəsinin standart paketindən (85 faiz) və əmək kollektivinə səhmlərin (8,96 faiz) güzəştli satışından sonra qalanlardan ibarətdir.
Müsabiqədə Azərbaycanın fiziki və hüquqi şəxsləri, xarici investorlar iştirak edə bilərlər. İddiaçılar müəssisənin fəaliyyətinin bərpası üzrə təkliflərlə birgə investisiya proqramını təqdim etməlidirlər.
İddiaçılar investisiya təklifinin 5 faizinə görə bank zəmanətini və dövlət büdcəsinə 150 min manat ödənilməsi üzrə təklif təqdim etməlidirlər. İddiaçı müsabiqənin şərtlərini və tələblərini yerinə yetirilməsi üzrə niyyətinin ciddiliyini təsdiq etmək üçün istənilən bankın 50 min manat dəyərində zəmanət məktubunu təqdim etməlidir.
