Bakı. Elçin Mehdiyev – Trend:
“Son dövrlər biz yenidən bir sıra anti-Azərbaycan mərkəzlərinin fəallaşması fonunda bir sıra siyasiləşmiş QHT-lərin, hüquq müdafiə təşkilatlarının, o cümlədən media qurumlarının ermənipərəst mövqelərdən çıxış edərək, şər-böhtan kampaniyalarına start verilməsinin şahidlərinə çevrilməkdəyik. Xüsusilə, ölkəmizdə mühüm ictimai-siyasi hadisələr, seçkilər, əhəmiyyətli tədbirlər ərəfəsində adıçəkilən mərkəzlərin fəallaşması arxasında dayanan bir neçə məqamlar var ki, onlardan biri və ən əsası Azərbaycanın beynəlxalq aləmdə müstəqil siyasət yürütməsi, söz sahibinə çevrilməsidir”.
Bunu Trend-ə siyasi ekspert Bəhruz Quliyev OCCRP adlanan qurumun ("Mütəşəkkil Cinayətkarlıq və Korrupsiya Hesabatı" layihəsi) şantaj xarakterli “hesabatı” kontekstində bir sıra KİV-də yayılmış materiallara münasibət bildirərkən deyib.
B.Quliyevin sözlərinə görə, məhz Azərbaycanın bir sıra post-sovet ölkələrindən fərqli olaraq qətiyyətli və müstəqil siyasət yürütməsi ölkəmizi forpost, marionet ölkələrdən kəskin şəkildə fərqləndirir:
“Bu faktor isə sözügedən mərkəzlərdə qıcıq yaratmağa başlayır. Belə ki, bu mərkəzlərin təməli funksiyasında erməni lobbisi və bu lobbinin maliyyə yardımları dayanmaqdadır. Eyni zamanda, bir müddət Azərbaycanda da ofisi olmuş, lakin bəlli səbəblərə görə fəaliyyətinə xitam verilmiş milyarder Corc Sorosun da adı bu məsələlərdə tez-tez hallanmaqdadır. Əbəs yerə deyil ki, OCCRP də daxil olmaqla, “BBC News”, “The Guardian”, “Washington Post”, “France 2”, “Sərhədsiz Reportyorlar” və s. kimi bir-birindən fərqlənməyən media qurumlarının Azərbaycan əleyhinə çirkin kampaniyalara qoşulmaları arxasından imperialist maraqları ilə seçilən Corc Sorosun adı çıxır. Misal üçün, “Washington Post” qəzetində Azərbaycana qarşı verilən şantaj xarakterli məqalənin müəllifi bilavasitə ermənidir və onun həmin materialla çıxış etməsini təmin edən də neoimperialist mövqeli Corc Sorosdur. Çünki bu adam bir sıra keçmiş ittifaq respublikalarında süni şəkildə yaratdığı rəngli inqilabları sayəsində Qərbin pərdə arxası siyasət yürütməsinə şəraitlər yaratmışdı. Müstəqil Azərbaycanda isə nə onun, nə də ona dəstək göstərən digər siyasi güclərin maraqları gerçəkləşməmişdi. İndi, o bir növ OCCRP adı altında Azərbaycandan intiqam hissi alır. Lakin onun göstərdiyi çabaları hər zaman olduğu kimi, bu dəfə də nəticəsiz qalmaqdadır. Əlbəttə ki, onun bu uğursuzluqlarına söykənən bir sıra səbəblər mövcuddur”.
B.Quliyev bildirib ki, digər tərəfdən, bu gün OCCRP həqiqətən də ədalət carçısı olduğunu var gücü ilə bağırırsa, eyni zamanda korrupsiya faktlarını araşdıran real bir şəbəkədirsə, onda buyursun Qarabağ işğalı faktını da ictmailəşdirsin, bir milyondan artıq azərbaycanlının doğma yurd-yuvalarından qaçqın və məcburi köçkün düşdüyünü bəyan etsin, eləcə də Ermənistan rəhbərliyinin korrupsiyalaşmış məmurlarının işğal altındakı ərazilərimizdə hansı oyunlardan çıxdıqlarını hesabatlarına daxil etsin:
“Bu gün erməni lobbisi Dağlıq Qarabağın işğalını qanuniləşdirməsi üçün ABŞ, Fransa, Rusiyada siyasətçilərini böyük məbləğlər vasitəsilə ələ alır və bu korrupsiya faktları barədə nədənsə bir kəlmə olsa belə, yazılmır: “Əlbəttə, bu faktlar OCCRP-nin feyk qurum olduğunu sübuta yetirmiş olur. Yəni OSSRP birbaşa ölkəmizə açıq düşmən münasibəti ilə seçilən xarici siyasi dairələrin informasiya müharibəsində vasitə rolunu oynayır. Çox təəssüfedici haldır ki, sapı özümüzdən olan baltalar bənzər şantajlarda xüsusi canfəşanlıqlar göstərirlər”.
Siyasi ekspert hesab edir ki, heç vaxt Sorosun, erməni lobbisinin oynadığı oyunların reallaşmasına imkan verilməyəcək: “Azərbaycanda Prezidentinə, dövlət siyasətinə güvənən xalq-iqtidar birliyi mövcuddur və bu birlik əsaslı şəkildə mənfur mərkəzlərin maraqlarını alt-üst edir, onların ölkəmizlə bağlı qurduqları xam arzuları, xülyaları puç olur”.