Gürcüstan, Tbilisi, 25 iyul/ Trend , müxbir N.Kirtsxaliya/ Gürcüstanın ərazi bütövlüyü prinsipi sarsılmazdır, lakin abxazlar fiziki, siyasi-iqtisadi təhlükəsizlik zəmanətinə malik olmalıdırlar, - ABŞ Dövlət katibi müavininin köməkçisi Metyu Brayza hesab edir.
"Amerika və Almaniya diplomatları bu gün Abxaziya separatçılarını gürcü-abxaz münaqişəsinin tənzimlənməsi üzrə gələn həftə Berlində keçiriləcək məşvərətlərdə iştirak etməyə inandırmağa çalışacaqlar", - Tbilisidə jurnalistlərə Brayza deyib.
Bu məqsədlə ABŞ nümayəndə heyətinə başçılıq edən Brayza və Almaniyanın Gürcüstandakı səfiri Patrisiya Flor Abxaziya liderləri ilə görüş keçirmək üçün Suxumiyə gedəcəklər.
"Mən münaqişənin tənzimlənməsi üzrə BMT Baş Katibliyi yanında necə deyərlər, Gürcüstanın dostları adlandırılan qrupun işləyib hazırladığı və Almaniya XİN-in başçısı Frank-Valter Ştaynmayerin təqdim etdiyi plan üzrə intensiv danışıqlar aparmışam və indi mən Tbilisidəki dastlarımızla fikir mübadiləsi edəcəyəm", - Brayza qeyd edib.
"Biz Almaniya səfiri ilə birlikdə abxazları Berlində keçiriləcək görüşdə iştirak etməyə inandırmaq istəyirik, bu vacibdir", - o deyib.
Brayza bildirib ki, Ştaynmayerin planında "həm Gürcüstan , həm abxazlar, həm də münaqişənin tənzimlənməsində maraqlı olanlar üçün müsbət elementlər var. Digər tərəfdən, bu yalnız təklifdir və indi danışıqlar aparmaq lazımdır".
Brayza həmçinin qeyd edib ki, bütün təkliflər Gürcüstanın ərazi bütövlüyü prinsipinə əsaslanır. "Eyni zamanda, abxazlar fiziki, siyasi-iqtisadi təhlükəsizlik zəmanətinə də malik olmalıdırlar", - o əlavə edib.
