Azərbaycan, Bakı, 12 yanvar/ Trend , müxbir Y.Ostapenko/ Avropa İttifaqı Qəzzə Zolağında atəşkəs rejiminin təmin edilməsi üzrə danışıqları, eləcə də Misirin İsrail-Fələstin münaqişəsinin nizamlanmasına dair təklifini tam dəstəkləyir, - Avropa İttifaqının xarici siyasət üzrə ali komissarı Havyer Solana elektron poçtla Trend -a bildirib.
Misirin təşəbbüsü İsrailin Qəzzə Zolağında əməliyyatının və HƏMAS yaraqlılarının yəhudi dövlətinin ərazilərini atəşə tutmasının dayandırılmasını nəzərdə tutur. Bundan başqa, Misirin təklifləri İsrail və Qəzzə Zolağının sərhədlərində təhlükəsizliyin təmin edilməsi, Fələstinin parçalanmış qruplaşmalarının birliyinin bərpa edilməsini şərtləndirir.
"Biz Qəzzə Zolağında təcili atəşkəs və humanitar yardımın münaqişə qurbanlarına maneəsiz çıxışına çağırırıq", - Solana deyib.
İsrailin HƏMAS-a qarşı əməliyyatının başladığı vaxtdan təxminən 910 fələstinli öldürülüb, - BBC fələstinli həkimlərə istinadən xəbər verib. İsrail hərbçiləri 13 əsgərin öldürüldüyünü bəyan edirlər.
İsrail HQQ dekabrın 27-də Qəzzə Zolağını raket atəşinə tutub. Dekabrın 19-da HƏMAS və İsrail arasında barışığın müddəti başa çatdıqdan sonra, HƏMAS dörd fələstinlinin öldürülməsinə cavab olaraq, İsrailin Aşkelon və Sderot yaşayış məntəqələrini raket atəşinə tutub.
Müəlliflə əlaqə saxlamaq üçün elektron ünvan: [email protected]