Azərbaycan, Bakı, 14 mart / Trend , müxbir R.Dərəxşan/
Nümayəndələr Palatasının Xarici əlaqələr komitəsinin qondarma "erməni soyqırımı"nı tanıyan qətnaməsi səhvdir. Bu barədə şənbə günü ABŞ-ın müdafiə naziri Robert Geyts əl-Ərəbiyyə kanalına müsahibəsində bildirib. Məlumatı Anadolu agentliyi yayıb.
"Biz, şübhəsiz ki, ümid edirik, Konqres və Nümanyəndələr Palatası bu qanun layihəsini irəliyə doğru aparmayacaqlar", - Geyts deyib. Onun sözlərinə görə, belə qətnamələr Türkiyə-Amerika münasibətlərinə çox zərər vura bilər.
ABŞ Konqresinin Nümayəndələr Palatasının Xarici əlaqələr komitəsi martın 4-də "erməni soyqırımı"nın tanınmasına dair qətnamə qəbul edib. 23 konqresmen sənədin lehinə, 22-ci əleyhinə səs verib.