İran Prezidentinin Xəzər dənizinin statusunun müəyyənləşdirilməsi üzrə nümayəndəsi Mehdi Axundzadə yanvarın 17-də Moskvaya ikigünlük səfər edəcək. Bu barədə İranın Rusiyadakı səfirliyinin saytı məlumat verib.
Axundzadənin səfərinin məqsədi Rusiyanın rəsmi nümayəndələri ilə Xəzər dənizinin statusu üzrə məsələləri müzakirə etməkdir.
Xəzəryanı dövlətlər 2003-cü ilin noyabrında Xəzərdə dəniz mühitinin qorunması üzrə Çərçivə Konvensiyasını imzalayıblar.
1998-ci ilin iyulunda Qazaxıstanla Rusiya arasında yeraltı sərvətlər üzrə suveren hüquqların həyata keçirilməsi məqsədi ilə Xəzərin şimal hissəsində dəniz dibinin bölünməsi haqqında saziş imzalanıb, 2002-ci ilin mayında isə həmin sazişə müvafiq protokol imzalanıb.
2001-ci il noyabrın 29-da və 2003-cü il fevralın 27-də Qazaxıstanla Azərbaycan arasında Xəzər dənizinin dibinin bölünməsi haqqında saziş və ona müvafiq protokol imzalanıb.
2007-ci ildə Tehranda Xəzəryanı ölkə başçılarının ikinci sammitində Xəzər dənizinin hüquqi statusu haqqında konvensiya layihəsinin yekun razılaşdırılması və qəbulu üçün gələcək işin konkret istiqamətləri müəyyən olunub.
Həmçinin, 2003-cü il mayın 14-də Qazaxıstan, Azərbaycan və Rusiya arasında Xəzər dənizinin həmsərhəd hissələrinin bölünməsi xəttinin qovuşma nöqtəsinə dair saziş imzalanıb.
Yanvarın sonunda Bakıda Xəzər dənizinin statusu məsələsi üzrə işçi qrupunun iclası keçiriləcək.