Bakı. Trend:
ABŞ hərbçiləri cümə günü Alyaska ştatı üzərində səmada görünən aerostatı vurublar.
Trend xəbər verir ki, bunu Ağ Ev Milli Təhlükəsizlik Şurasının nümayəndəsi Con Kirbi deyib.
"Mən təsdiq edə bilərəm ki, Müdafiə Nazirliyi son 24 saat ərzində Alyaska ştatı üzərində yüksək hündürlükdə bir obyekti izləyib. O, təqribən 12 min metr yüksəklikdə uçub və mülki uçuşların təhlükəsizliyinə açıq təhlükə yaradıb. (...) Pentaqonun tövsiyəsi ilə ABŞ prezidenti Co Bayden hərbçilərə bu obyekti vurmağı əmr edib və onlar bunu yerinə yetiriblər", - deyə C.Kirbi bildirib.
Onun sözlərinə görə, aerostat ABŞ-ın ərazi sularına düşüb.
C.Kirbi vurğulayıb ki, Vaşinqton hələlik bu hava obyektinin kimə məxsus olduğunu bilmir. O əlavə edib ki, o, daha əvvəl vurulmuş Çin aerostatından xeyli kiçikdir.